VC leh LC chuh tumte hming endik a ni Candidate 1,236 an awm dawn

Village council leh local council inthlanna neih tura hming pek luhte chu nimin khan endik a ni. Aizawl Municipal Council (AMC) chhunga local council 83-a seat 535 chuh turin candidate 1,236 an awm dawn.

VC leh LC inthlan atana hming pete endik hna hi nimina thawh a nih bakah, nimin chhun dar 12 khan inhnuhdawh hun a tawp.

Nomination-te endik a nih hnuah, Aizawla LC chuh tur chu mi 1,236 an ni ta a, chung zinga 918 chu general seat chuh tur niin, mi 318 chu hmeichhe tana seat hauh chuh tur an ni.

Hetih lai hian, Mission Vengthlang LC-ah vantlang candidate, independent-a ding mi pasarihte bak chuhtu an awm loh avangin mi pasarihte chu nimin khan returning officer-in tlingah a puang a; hei vang hian LC 82-ah inthlan vote thlak a ni ang.

Aizawl district-a V/C 95 inthlanna tura ruahmanah khaw 24-ah HPC(D) vauna vanga chuh tura hming pe an awm loh avangin inthlanna neih theih a ni dawn lo a, nimin khan HPC(D)-te vauna vang bawkin Ratu khuaa hming pe lut tawhte pawh an inhnûkdâwk leh vek a ni.

Aizawl district-ah hian V/C 70-ah inthlan neih theih tura ngaih a ni a; candidate ding tlang turte chu 786 niin, general seat chuh tur mi 594 leh reserved seat chuh tur hmeichhia 192 an ni.

Serchhip district-ah chuan V/C 49-a seat 215 chuh turin candidate 587 an awm a, general seat chuh tur mi 443 leh reserved seat chuh tur mi 144 an ni. Baktawng Tlangnuamah chuan chuhtu awm loin INC candidate mi pali leh MNF candidate pakhat an tling.

Kolasib district-ah V/C 52 awm mah se, HPC(D)-te vauna avangin khaw panga - Saipum, Saiphai, N. Hlimen, Phainuam leh N. Chawnpuiahte chuan inthlanna neih theih a ni dawn lo. Saipum leh Saiphaiah hian chuh tuma hming pe an awm lo a; N. Hlimen, Phainuam leh N. Chawnpuiah erawh chuan candidate turte'n hming an pe lut a, mahse nimin khan an inhnûkdâwk leh vek a ni.