CM-in Reiekah lungphùm a phúm

Chief minister Zoramthanga chuan December 15, Thawhlehni khan Reiek damdawi-in (public health centre) sak ṭhatna tur leh Reiek Water Supply Scheme (feeding & pumping) siamna tur lungphùm a phúm.

Lungphûm puala inkhawmah Chief Minister chuan, mipui hriselna a ngai pawimawh a, damdawi-inte a rem ang zela tihchangtlun tum a nih angin Reiek PHC thar sakna tur lungphùm pawh phùm a nih thu a sawi a; Reiek khaw tan tui thianghlim lâkna tur thar a awm dawn ta chu a lawmpui thu a sawi bawk.

Lungphûm inkhawm hi HFW secretary H Lalengmawia'n a kaihruai a; minister of state Robert Romawia Royte leh bialtu MLA Lalrintluanga Sailo te pawhin thu an sawi a ni.

Reiek PHC sakna atan Rs. 2,89,53,700 ruahman a ni a, ft. 7,242.6 biala zau, chhâwng hniha sak tur a ni. A satu tur contractor chu Zamzo Engineering Construction & Consultancy a ni a, work order tihchhuah ní aṭanga thla 18 chhunga sak zawh tur a ni.

Reiek Feeding & Pumping Water Supply Scheme (Gravity Flow & Pumping System of Water Supply Scheme) siam nan NABARD aṭangin Rs. 12,96,63,000 ruahman a ni.