Quarters-a mite chhuahtir lo turin ngen

PRISM leh Human Rights & Law Network (HRLN)-te chuan thuchhuah siamin, Aizawl Civil Hospi­tal quarters-a chengte hnawh­chhuah tumin sorkarin hma a la mek niin an tarlang a, "Thil ṭul lo tawpah kan ngai a, sût leh turin sorkar kan ngen a ni," an ti.

PRISM leh HRLN chuan, ACH medical superinten­dent-in February 27, 2015-ah tuna ACH quarters-a cheng mek chhungkaw 15-te chu April 30, 2015 hmaa quarters chhuahsan turin a hriattir niin an sawi a; chhuahtir an nih chhan chu Trauma Centre sak a nih dawn vang nia sawi a ni.

ACH-a Trauma Centre sak tum chungchangah PRISM leh HRLN-te chuan Hospital & Medical Educa­tion directorate-ah RTI Act hmangin information an dil a; chhanna an dawn danin, Trauma Centre sakna tura an ruahman chu tuna quarters awmna ni lo, ACH building leh Dawrpui Multipurpose Centre sak an tumna inkara hmun ruak mekah a ni.

Trauma Centre sak hna ṭan turin building plan leh estimate siam a la nih loh thu te, a satu tur contractor pawh thlan a la nih loh thu te, sak ṭan hun tur sawi theih a la nih loh thutein DHME chhanna chuan a tarlang bawk.