HPC(D) invaunaa hma la vat turin Group YMA-in sorkar an phût

YMA, Sakawrhmuituai group chuan thuchhuah siamin, V/C inthlan hmaa HPC(D)-te vauna lehkha vanga nun rálmuang lo an awm loh nana hma la vat tur­in Mizoram sorkar an phût thu an tarlang.

Sakawrhmuituai group YMA thuchhuah chuan, April 9, 2015-a HPC(D) general headquater's mi, John F Hmar intiin Sakawrhmuituai group YMA huam chhunga N. Hlimen khuaa V/C in­thlan awm tura candidate-te a vau chu an dem thu a sawi a, "In candidate luite chu an chunga action lak a nih tur thu leh action lakin hun a neih loh tur thu N. Hlimen VCP hnena hriatirna lehkha a pe hi a vanduaithlak kan ti," a ti.

Sakawrhmuituai group YMA chuan, democracy ramah invaubehna nena HCP(D)-te'n thil an la ti chu an hriatthiam loh thu sawiin, HPC(D)-te chu an area-ah N. Hlimen rín lût tawh lo turin an ngen a; "HPC(D)-te lehkha vanga mimal nun rálmuang lo a awm loh nan sorkarin hma la vat se kan duh a. HPC(D)-te pawh hian ngaihtuahna hmang nawn leh se kan duh hle a ni," an ti bawk.

Thu dawn danin, N. Hlim­en khuaah hian V/C inthlan atan party hrang hrangte'n candidate siamin, candidate tur­te pawhin nomination paper an thehlut vek tawh a, mah­se HPC(D) vauna vang hian nimin zing khan VCP Rem­thanga'n candidate-te chu a kokhawm a, V/C candidate aṭangin an inhnûkdâwk vek a ni.