P/S zirlaibuah zir tur tam zawk - SCERT 2016-17 ah Cl V-VIII tan zirlaibu thar

SCERT hotute chuan, primary school-a zirlaibu (textbook) tihtlem ni mah se, a khawih chin leh zir tur erawh a tlem lo a, a hma ai mahin a tam zawk niin an sawi. Kum 2016-17 academic session aṭangin pawl 5-8 ah pawh NCERT syllabus angin zirlaibu thlak tum a nih thu an sawi bawk.

SCERT hian nimin khan media-te tan primary school zirlaibu thar zirhona hun an office-ah an buatsaih. SCERT director Malsawmthangi chuan, SCERT chu elementary education (pawl 1-8) zirlaibua thuneitu a nih thu sawiin, NCERT textbook hmang tura kum 2012 aṭanga an inbuatsaih ṭan hnuah 2015-ah hman ṭan a ni ta tih a sawi.

Malsawmthangi chuan, NCERT syllabus chu mahni state mila her danglam hret phal a nih angin, Mizoram leh Mizote mila tihdanglam hret hret a nih thu a sawi a, "Mizo medium leh English medium-te zirlaibu inang hmang vek turin kan ti a, hei hi zirlaite'n an rualkhai phah dawn a, a fair hle a ni," a ti.

SCERT hotute sawi danin, NCERT textbook hmang tur hian sorkarin Textbook Committee a din a, chumi hnuaiah chuan subject mal tin khawih turin Subject Committee din leh a ni.

Committee-ah hian Mizoram University, college, IASE, MBSE, DIET, SCERT, zirtirtu pawl hrang hrang aiawhte an tel a; anni rawtna ang hian zirlaibu thar tur chu pawm a ni.

SCERT joint director Laldawng­liani Chawngthu chuan, primary school-a zirlaibu tlem ta chu sawifiahin a sawiseltute chuan National Curri-culum Framework (NCF) tum bulpui an hriat loh vang a nih a rinawm thu a sawi. Zirlaibu chu tlem mah se, subject an zir ṭhin, tuna paih tak anga langte chu tuna subject an neih mekah telh vek tho a ni tih a sawi.

Laldawngliani Chawngthu sawi danin, English medium school-a graded subject an zir ṭhin - General Knowledge (GK), Information technology (IT) leh Art Education-te chu tuna textbook-ah chuan subject pakhat anga awm tawh loin paih a ni. He thil hi July 3, 2014-ah zirtirtu pawl - MSTA, MPTA, MEMSOT aiawhte leh kohhran sikul enkawltute nen an sawiho a, lungrual takin GK, IT leh Art Education-te chu paih an remti a ni.

SCERT hotute chuan, textbook chu tlem mah se zir tur a tam thung tih sawiin, "Zirlaibu pakhatah zir tur tam tak a awm. Grammar chu a bu hranga zir loin, Mizo leh English textbook-ah a tel a, Art education pawh Mizo, English, Mathematics leh EVS textbook-ah telh a ni. IT leh GK-te pawh tuna textbook chhungah hian a awm vek a ni," an ti.

English medium school ṭhenkhat hotute'n textbook thar hman tur sorkarin a hriattir har nia an sawi chungchanga zawhna chhangin, Laldawngliani Chawngthu chuan, "Textbook thar hman tur hi kan sawina a rei tawh a, July 2014-ah MEMSOT hruaitute nen pawh kan sawiho tawh a, December 23, 2014-ah hriattirna kan chhuah tawh," a ti.

English medium class III & IV-a Hindi an la telh chu a hmaa an lo zir ṭhin a nih vangin kumin bik atan an la telhtir rih a, nakkum lamah erawh chuan a tel tawh lo mai thei niin a sawi a, "Language subject hi first language, second language leh third language tia ṭhen a ni a, third language hi chu class-V aṭanga zir ṭan tur a ni," a ti.

SCERT joint director chuan, elementary school syllabus tharah hian a tak taka tih ngei ngaih pawimawh a nih thu te, lehkhabu pakhatah zir tur hrang hrang dah khawm te, zirlaite'n phurrita ngai loa nuam taka an zir theih dan tur te, textbook pawn lam thil zir teltir te, mahni chenna ram chanchin zirtirte ngaih pawimawh a nih thu a sawi.

Bye-heart system tihtawp tum a nih thu sawiin, "Zirlaibu tharah chuan bye-heart tur a awm lo hrim hrim a ni," a ti bawk.

P/S textbook hman mekte:

• Mizo medium Class I & II-ah Mizo, English leh Mathematics.

• Mizo medium Class III & IV-ah Mizo, English, Mathematics leh Environmental Studies.

• English medium Class I & II-ah Mizo, English leh Mathematics.

• English medium Class III & IV-ah Mizo, English, Mathematics, Environmental Studies leh Hindi.