KHAWTHLIR

ZENICS chairman
Zoram Electronics Development Corporation Ltd. (ZENICS) chairman thar Chalrosanga Ralte, MLA chuan nimin khan a pisa tharah Congress ṭhalaite thingpui a inpui a, "He mawhphurhna ka chunga tla hi sorkarin ṭhalaite a ngaih pawimawhzia lantirna a ni," a ti. ZENICS hi kum 1991-a din a ni a, Chalrosanga Ralte hi chairman 10-na a ni.

MJA Library pe
MJA Public Library-a dah turin Hmingtea Chhangte-in a lehkhabu ziah, 'Zawlkhaw Di Tleitir' tih bu hnih leh Dr Zohmangaiha'n a lehkhabu lehlin 'Zing thawh hma' tih bu hnih an pe a; an chungah MJA-in lawmthu a sawi.

Training tur fuihna
Labour, Employment & Industrial Training department leh Mizoram Youth Commission ṭangkawp chuan, nimin khan ATI conference hall-ah Mizoram páwna training tur ṭhalai 45-te fuihna hun an buatsaih. Training turte hi SBJ Centre of Excellence, Greater Noida-a beauttician leh spa therapy-a training turte an ni.

Zu zuar 98 man
Excise & Narcotics department chuan, March 2015 chhung khan zu rûi 49, zu zuar 98, rakzu litre 4,013.275, sap zu (ûm puitling) 2,867 leh zu kaihhnawihah lirthei paruk an man.

Luiah tla hlum
Nimin chawhnu dar 2 vel khan Chhimtuipui leh Sahrichhuah lui infinna bulah Sanghaia (47), Lawngtlai Vengpui a tla hlum a, he thu ziahlai hian a ruang hmuh a la ni lo. Sanghaia chetsual dan tak hi hriat a ni lo a, amah hi ṭhiante nen sangha man tura kal an ni.

Power awm dawn lo
Power Grid Corporation of India chuan vawiin hian Zuangtuia 132 KV Sub-Station-ah hna an thawk dawn a; hei vang hian he Sub-Station a chawm khua leh vengte chuan vawiin hian zing dar 7 aṭanga tlai dar 3 thleng kawlphetha an hmu lo ang.