2014-ah sikserh vangin mi 31 an thi

National Vector Borne Diseases Control Programme (NVBDCP) hnuaia hmalakna thlirletna hun, State Quarter Review Meeting chu nimin khan Health directorate conference hall-ah neih a ni a; kum 2014 chhungin sikserh vangin mi 31 an thi tih tarlan a ni.

Meeting hi Health Services joint director (Malaria) Dr C Zarzoliana'n a kaihruai a; khuallian, Health Services director Dr Rohmingthanga Ralte chuan, NVBDCP hnuaia thawktute chu mipuite hnenah 'Tihdam aiin inven a ṭha zawk' tih hrilhhria a, thosi tui theihna tihbo te, thosilen zàr ṭhat te, DDT-a chênna in kahtir a pawimawhzia zirtir ṭhin turin a chah.

Health Services deputy director (Malaria) Dr Lalremmawii tarlan danin, kum 2014 chhung khan Mizoramah mi 2,56,875-te thisen endik a ni. Heng zinga mi 18,513 hian sikserh an vei a, mi 16,947 chu malaria PF niin mi 1,566 chu malaria PV an ni.