HPC(D)-te laka sorkar hmalaknaah Eptute'n sorkar an thláwp: HM Zira

Home minister R Lalzirliana chuan, HPC(D) laka sorkar hmalak dan turah political party tinte'n sorkar an thláwp tih a sawi a, "Oppostion party-te'n hnam ropuite zia an pu ṭan a, a lawmawm hle," a ti.

Home Minister hian nimin khan Congress Bhavan-ah thu sawiin, HPC(D)-te chu pawisa an khawn avangin an hotute man an lo nih tawh thu a sawi a, "Jail-a rei tak an awm hnuin bail-a chhuah an ni. Bail-a an chhuah hnuin sorkarin fate anga a en avangin a ûm zui vak lo a, kawng dik an zawh theih a beisei a ni. Mahse, kan MLA-te vengtu kan police pawisawi lo an kah hlum tâkah chuan sorkar­in do let turin ṭan a la a ni," a ti a; HPC(D)-te chuan sorkar hmangaihna chu hmangaihnain an chháng lêt duh lo niin a sawi.

R Lalzirliana chuan, Hmar hnam tam zawkin HPC(D)-te chu an thláwp lo tih sawiin, "Manipur leh Mizorama Hmar tam ber hian an thlawp lo. An demand area-a awmte pawhin hrehawm an ti em em a, heng mite chhanchhuah hi kan mawhphurhna a ni tih kan hai lo," a ti.

Mizoram police-te chu rin­tlak vek an ni tih sawiin Home Minister chuan, "Police-te hian mipui duh dan an hria a, theihtawp an chhuah a ni. State páwn pawh ni se misualte kan ûm laklawk tawh a, kan ûm zel ang. Manipur sorkar pawhin harsatna min siamsak lo a, HPC(D)-te hian lainattu tam tak an neih avangin mipui duh danin police-te an la che thei lo. Operation nei mekte an fakawm hle a ni," a ti a; police-te chu ring ngam turin Mizo mipuite a sáwm.

R Lalzirliana chuan, disturbed area kalphung tur duan mek a nih thu sawiin, "Tun dinhmunah hmang tut tut lo mah ila, Mizoram hi ramri tam tak nei a nih avangin hman duh hun a awm thei. Session-a put luh turin a kalphung tur duan mek a ni. Sipaite'n thuneihna sang tak an neihna, hel nia an hriatte an kah hlum tawp tawp ang theihna kha chu telh kan tum lo," a ti.

Home Minister sawi danin, disturbed area an duan mek chu sorkar laipui dan Armed Forces (Special Powers) Act ang a ni lo a, Mizoram state bikin a hman tur, Mizoram mila buatsaih tum a ni.