HM mualphona tàwp a tling: Zorama

MNF president Zoramthanga chuan, April 30, 2015-a V/C inthlan turah khaw 31-ah V/C thlan theih a ni dawn lo chu Home Minister mualphona tàwp a tling niin a sawi a, "Ka moral responsibility a ni, tiin bànna thehluh a hun hle tawh a ni," a ti.

Nimina Mizo Hnam Runa inkhawmah thu sawiin Zoramthanga chuan, V/C thlan turah helho vauna vanga khaw 26-ah chuh tura hming pe lut ngam an awm lo te, nomination file tawhna khaw dang pangaah candidate-te an inhnûkdâwk lehte chu dan leh thu pek kenkawh zawh lohna chiang tak a nih thu a sawi.

Zoramthanga chuan, hel pawl ṭhenkhatte tih­ṭhaihna huam chhunga awmte chu an lainat tak zet thu sawiin, MNF-in an ngaihven reng niin a sawi a, "Zo hnahthlak inunauna engti zawng maha tihchhiat kan phal lo," a ti.

V/C inthlan tur khaw ṭhenkhatah neih theih a ni lo chu democracy lungphum bulpui ber hman theih lohna a nih thu sawiin, Zoramthanga chuan, "A na hle a ni. Hei hi sorkar ding lai mawh liau liau a nih avangin, khaw nge kan police lâkte kha hmang ṭangkai ang hmiang, vaupûng hian himna a thlen lo a ni tih kan hmu a ni," a ti.

MNF president chuan, Mizoram buai vanglai leh curfew puan ṭhin lai pawhin inthlanna neih theih lohin a awm ngai lo nia sawiin, "State rálmuang berah khaw 30-ah V/C inthlan neih theih a ni lo hi sorkar mualphona a ni a, thil zahthlak tàwp a tling. Hei aia dan leh thupek kengkawhnaa chhiatna leh mualphona a awm chuang lo," a ti.

Mizoram sorkar chu V/C thlanna felfai tak a awm theih nana hma la nghal turin a phût bawk.