CM Hawla leh MZP hruaitute an inkâwm

MZP hruaitute chuan April 16 tlai khan chief minister Lal Thanhawla chu a chenna bangla-ah an hmu a, zirlaite leh ram leh hnam tana thil pawimawh hrang hrangte an sawipui.

MZP-in CM an sawipuite chu, UPSC coaching centre siam, Lokayukta din, career awareness campaign neih, pensioner rawih nawn, Mizoram political map leh Mizoram ramri hrûla venhimna chungchangte a ni.

MZP tarlan danin, CM Lal Than­hawl­a chuan, UPSC Civil Service coaching centre changtlung tak Mizorama a awm theih nan hmalak a tum thu a lo hrilh a; Lokayukta chu hna thawk theia siam thuai a ṭul thu a sawi.

Mizoram poltical map hman mekah Mizoram hmar lama khaw ṭhenkhat - Saihapui V, Upper Phainuam, Phainuam Khasi Veng, Aitlang lui ram, Vairengte Khasi Veng zawng zawngte a huam tel lo nia sawiin, MZP hruaitute chuan chungte chu Mizoram political map-a rìn luh a nih theih nana hma la turin CM an ngen a; CM Hawla chuan hmalak a tum thu a lo hrilh.

MZP hian April 16 khan Mizoram rawn tlawhtu BJP president Amit Shah hnenah memorandum an lo pe a; memorandum-ah chuan tun hma aṭangin Mizoramah Chakma-te chu ram leilung fa an nih ngai loh thu sawiin, Bangladesh aṭangin Chakma foreigner dan loa lut an tam thu leh chu avang chuan Mizoramah Chakma-te an pun chak thu an tarlang.

Chakma foreigner-te zawn chhuah an nih theih nan leh Bangladesh aṭanga dan loa an lo luh tawh lohna tura a chinfel dan ngaih­tuahpui turin an ngen a ni.