KHAWTHLIR

Lawngtlaia Region Higher Secondary School NSS unit chuan nimin khan Lawngtlai District Hospital-ah thisen unit 9 an pe a, petute mipa paruk leh hmeichhia pathum an ni.

Dicipleship Training Institute (DTI) chuan Sihphir Neihbawiha an hmunah Thawhlehni khan Graduation Day an hmang a, an chairman R Vanlal­zauva'n thuchah a sawi. DTI Graduation Day-ah hian dicipleship course zir zo mi 11 thlah an ni.

Health department chuan December 15, Thawhlehni khan hriattirna chhuahin, Aizawla hmun pahnihah awlsam zawka mipuiin swab sample an endiktir theihna, 'Sample Collection and Testing Kiosk' dah thar a nih thu a tarlang. Sample Collection & Testing Kiosk dahna hmun chu - Chawlhhmuna Junior Cooperative Training Centre leh Bawngkawn South Cultural Centre-te a ni.

Mizoram University-a Depart­ment of Library and Information Science leh Faculty of Information Management, Universiti Teknologi MARA, Malaysia chuan December 15, Thawhlehni khan thawh dun­na thuthlung memorandum of under­standing an ziak. MoU hnuaiah joint seminar, joint research leh joint publication-te leh zirlai leh thawktute thawhhona kalpui a ni ang.

State Referral Hospital-ah nimin khan Covid-19 vei mi panga dah luh an ni a, anni nen hripui vei mi 20 an awm mek. SRH-ZMC Bulletin tarlan danin, ICU-ah mi pakhat enkawl mek niin, oxygen pek a ni a, Isolation ward-ah mi 19 awmin, an zinga pathum chu oxygen pek a ni. Mi 20 zingah kum 60 chung lam mi pali leh naupang kum 14 hnuai lam pahnih an awm.

ngam lovah ZPM-te puh

Congress party ṭhalaite chuan thuchhuah siamin, ZPM MLA-te leh ZPM party ṭhalaite chu MLA aṭanga bàn tâk Lalduhoma thlavâng hauh ngam loah an puh.

MPYCC chuan, ZPM MLA-te chu eng vanga Lalduhoma thlavang hauh ngam lo nge tih an zawt a; "Keini Congress hi hetiang dinhmunah hian ding ve ila, kan MLA-te'n bàn huamin thlavâng an hauh ngam ang," an ti.

MNF ṭhalaite chuan, CSS hnuaiah Mizoram sorkarin Hindi teacher 500 chuang a la thar chu lawmawm an tih thu an tarlang a, "CM Pu Zoramthanga leh Education minister Pu Lalchhandama Ralte hmalakna ropui kan tiin kan chhuang," an ti.

MNYF thuchhuah chuan, Transport department-in two wheeler taxi permit sang chuang an pe chhuak chu lawmawm an tih thu leh ngaihtuahsaktu Transport minister TJ Lalnuntluanga an chhuan thu a tarlang bawk.