Rel station-a ILP endikna tur enfiah

Kolasib DC H Lalengmawia chuan, nimin khan Bairabi rél chawlhhmun tlawhin, rél lian a luh tak avangin chak zawka ILP endik a nih theih dan tur a enfiah a; rêl chawlhhmunah ILP pek chhuahna tur siam thuai a nih dawn thu a sawi.

Kolasib DC hi SP C Lalzahngoa leh Bairabi khawtlang hruaitute'n an ṭawiawm a; rél chawlh-hmuna waiting hall-ah temporary ILP pek chhuahna tur counter siam ni se an ti. Railways station superintendent NJ Pauk Chaudury chuan, counter siamnaah harsatna a awm loh tur thu a lo hrilh.

H Lalengmawia chuan, temporary ILP pek chhuahna tur chu a rang thei ang bera hawn a nih tur thu leh, rél chawlhhmun bul hnai National High-way kawngpui kama Transport department quarters chu hun lo kal zel tur atan ILP pek chhuahna tura cheibâwl ṭha an tih thu a sawi.

Bairabi khawtlang hruaitute chuan, Bairabi Tlawng lui aṭanga lawng hmanga hnam dang Mizorama lut an tam
ṭhin thu an lo thlen a; hemi chungchanga hian Kolasib SP chuan river police mamawh a nih thu sorkarah a thlen tawh thu a sawi.

Bairabi police-te chuan railway platform-ah zan dar 8 -10 inkarah patrolling an neih ziah thu leh police checkgate-ah uluk taka checking an neih ṭhin thu DC hi an hrilh.