Ram dang nena insumdawn tawnna sawiho Mizoram hi sumdawnna hmun ṭha a ni - ILO

International Labour Organization (ILO) hmalaknain, nimin khan NLUP conference hall-ah Mizoram thil deh chhuah leh Mizoram aṭanga thil siam chhuah hmanga Myanmar, Bangladesh leh Asia chhimchak ram ṭhenkhatte nen insumdawn tawnna tura company hrang hrangte Mizorama an inbun theih dan tur sawiho a ni. ILO mithiamte chuan, Mizoram chu sumdawnna hmun ṭhaa an ngaih thu an sawi.

Meeting kaihruaitu Home minister R Lalzirliana chuan, Mizoram chu kawng hrang hrang aṭanga thlirin company liante tan sumdawnna tur hmuh duhawm tak a nih thu sawiin, "A ralmuang a, rél kawng lianin a chhun tawh a, kawlphetha indaih lohna pawh hydro project thawh mekte'n an tikiang dawn a ni," a ti.

Finance minister Lalsawta pawhin thu sawiin, "Mizoramin ram ruak a ngah a, ramngaw leh leilung hausakna pawh a nei ṭha. Hetih rual hian, Mizoram sum leh pai dinhmun thlâk dâwrh tur chuan ram chhunga thil siam chhuah leh sumdawnna kalpui dan her danglam a ngai," a ti.

ILO-a Deft Advisory and Research director Partha S Banerjee chuan, sum leh pai dinhmun chawikan nan Mizoramin theihna a neih avangin, a takin sumdawnna bungrua leh service ṭha pe chhuak thei a ni tih a lantir a hun tawh thu a sawi.

Deft Advisory and Research senior adviser Subrata Dutta pawhin, Mizoram chu a ram ralmuanna vang leh inkalpawhna a ṭhat avangin India leh ṭhenawm ramte insumdawn tawnna tura hmun duhawm tak a ni tih a sawi a; an zirchianna aṭanga Myanmar ram leh Bangladesh-te'n an bungraw mamawh Mizoram aṭanga siam chhuah emaw, thawn chhuah theih tur an hmuhte a tarlang.

Meeting-ah hian sumdawng company-te'n an thil siam chhuah leh sumdawnna an kalpui dan tlangpui te, Mizoram aṭanga thil siam tur item pawimawh leh ṭhen-awm rama thawn chhuah tur te, sum leh pai dinhmuna Mizoramin hlâwkna a tèl theih dan tur te, Mizoram industrial policy leh a kaihhnawih te, kawlphetha leh thil danga Mizoramin harsatna leh tlakchham a neihte sawiho a ni.