KHAWTHLIR

Health camp

AH&Vety department chuan, nimin khan North Vanlaiphaiah Awareness Campaign cum Animal Health Camp an huaihawt. Vety doctor-te'n ran enkawl dan leh natna hrang hrangte enkawl dan an zirtir bakah, ran damlote an en a; a thlawnin damdawi an sem nghal bawk.

Training tan

Extension Education Institute, Assam Agriculture University leh Mizoram Agricultural Management & Extension Training Institute ṭangkawp chuan, Agricultural Management Technology Agency-a deputy project director, block technology manager, computer programmer, KVK Scientist-te leh Agriculture leh allied department-a thawktute tan nimin khan Agriculture committee room-ah ni li awh tur training an buatsaih ṭan.

E.Roll tichhuak

State Election Commission thupek angin, Aizawl Municipal Corporation huam chhunga local council pathum - Chite Veng, Chhinga Veng leh Mission Veng bye-election atana inbuatsaihna tur Draft Electoral Roll chu nimin khan tihchhuah a ni. Roll hi veng pathuma ERO, AMERO leh LLO-te hnenah en theih a ni.

Chhinchhiahna târ

Mizoram Remote Sensing Application Centre (MIRSAC), Directorate of Science & Technology leh Geography Association of Mizoram (GAM) ṭangkawp chuan Aizawl-Lunglei road, Maubuang Lungsai vengah Tropic of Cancer-in Mizoram a tan tlangna laiah hoarding tárin lung an phun.

Kal khap

Aizawl District Sub-Divisional Magistrate thupek chhuahin, Bawngkawn Brigade-a BCM Bawngkawn biak-in leh a chhehvelah phalna la hmasa loa kal a khap. Thupek hian thla hnih chhung a huam ang.

In saksak

July 10, 2016 zana ruahsur vanga in chim Thiaunawna, Farkawn chu Farkawn YMA leh V/C ṭangkawpin in an sak ṭhatsak. In hi ft. 18 leh ft. 15-a zau a ni a, in chung leh a bang atan rangva hman a ni.