Mahni thawh chhuaha intodelh theihna Mizoramin a nei tha - Finance Minister

Finance minister Lalsawta chuan, Mizoramin mahni thawh chhuaha intodelh theihna tur a neih ṭhat thu sawiin, chumi atan chuan mahni hma zawn ṭheuha theihtawp chhuah turin mipuite a sáwm.

Nimin khan Tuithiang Veng community hall-a khawtlang leh tlawmngai pawl hruaitute nena an inkawmnaah thu sawiin Lalsawta chuan, "Mizoram hian sorkar laipui aṭanga sum hai chhuaha innghat lo a, mahni thawh chhuaha intodelh theihna kawng kan neih ṭha hle. Chumi atan chuan mi dang puihna beisei ringawt lo a, kan tih theih leh thawh theih ṭheuh hreh lo leh ṭhahnemngai taka thawh hmasak a pawimawh," a ti.

Finance Minister chuan, Mizoram sorkar-in mipui hnenah ṭanpuina sum pek satliah a tum lo tih sawiin, "NLUP kalpui zel chungin tunah hian hmasawnna bung thar atan New Economic Development Policy kalpui tum leh mek a ni," a ti a; NEDP hnuaiah mi taima, mithiam leh dinchhuah tumte'n agriculture, horticulture, ran vulh leh industry lamah an inthlurbing tur thu a sawi.

Lalsawta chuan, sorkarin mithiam leh dinchhuah tumte tan mamawh inṭâwm, mimal leh pawl anga lei zawh si loh - warehouse, khawl lian, kawng ṭha leh inbiakpawhna ṭha zawk buatsaih leh hriselna lama inenkawlna mamawhte a ngaihtuah dawn tih a sawi bawk.