Yoga leh Aadhar kalpui dan ennawn turin ZNP-in sorkar a phût

ZNP chuan thuchhuah siamin, sorkar laipuiin Aadhar leh Yoga a kalpui dan chu ennawn se an duh thu an tarlang a, "Yoga hi mimal zalenna piah lama tihluihnaa hman hi kan duh lo a, kan state sorkar pawhin enfiaha do ngam turin kan duh," an ti.

ZNP chuan, miin taksa sawizawina atana Yoga an hmang a nih chuan an mimal zalenna a nih avangin an sawisel lo tih an sawi rualin, "Kan state chhung-a zirna in ṭhenkhat-ah tihluihnaa hman a ni mek ta hi sakhaw zalenna kalhah kan ngai," an ti a; Yoga chu in hman luihtir chi a ni lo tih sawiin, mimal zalenna piah lama tihluihnaa inhmantir chu Mizoram sorkarin ngam se an duh thu an sawi.

Yoga chu Hindu hoin ni pathian an biakna a ni tih sawiin, ZNP chuan, "International Day of Yoga atan pawh kum khata ni rei ber ni June 21 kher thlan a ni a, Hindu sakhaw biakna chi khat a ni tih hi sawi bo theih a ni lo. Lal Isua'n ṭawng-
ṭai dan min zirtir hi eng sakhaw betu tan pawh hman ve theih a ni a, mahse, intihluih chi a ni lo," an ti.

Aadhar Card chung-changah ZNP chuan, Supreme Court-in August 11, 2015-ah order chhuahin, mimal zalennaah a dah tih an sawi a, "Central sorkarin Aadhar card nei lote tan chuan sorkar aṭanga hamṭhatna hrang hrangte chu dawn ve theih loh turin a kalpui mek a, hei hi tihluihna tih ṭawngkam hmang si loa tihluihna ang tluk a ni," an ti a; sorkar laipui chu thup nei loa Aadhar chungchanga a policy-te chiang taka mipuite hrilh-fiah turin an phût.