MZU-in result tihsual tam an ngaimawh

Mizo Students’ Union (MSU) gen.hqrs. leh Aizawl City College Joint Students’ Union (ACCJSU) hruaitute chuan nimin khan Mizoram University thuneitute an hmu a; tun hnaia Mizoram University (MZU) degree course result chhuaka dik lo leh tihsual tam tak a awm avangin Controller of Examination báng tura an phût thu an thlen.

MSU leh ACJSU hruaitute hian MZU vice chancellor Prof. R Lalthan-tluanga leh controller of examination Prof. RL Thanmawia te an hmu a; Controller of Examination chu exam result-a dik lo awmte a mawhah la a, báng turin an ngên.

MZU Vice Chancellor hnenah, MZU result-ah dik lo tam tak a awm avangin zirlai tam takin harsatna an tawh thu an sawi. Result-a dik loh tam tak a awm avangin Examination-a a hotu ber Controller of Examination chu amah mimalin tihsual nei lo kher lo mah se, a mawhphurhna a nih avangin báng tura an duh thu hrilhin, bàn a nih theih nana hma la turin an ngên a ni.