N. Vanlaiphai-in district hqrs. pek an phût

20th July, 2016

North Vanlaiphai khua chuan district pek an phût a; district pek an ngenna leh phûtnate chu nimin khan Chief Minister leh Chief Secretary hnenah an thehlut.

N. Vanlaiphai District Demand Committee (NVDDC) chuan thuchhuah siamin, an khua chu British hun lai ata tawh Mizorama khawpui pawi-mawh pasarih zinga pangana a nia sawiin, "Khaw hlun leh pawimawh a nih ṭhin avangin Indopui Pahnihna lai, March 28, 1944 khan Japan hoin indo thlawhna paruk hmangin N. Vanlaiphai hi bomb in, an kap chiam tawh," an ti a; sorkar hmun pawimawh hmasa a nih avangin kum 1910 hma lamah bangla pawh sak a ni a, kum 1913-ah damdawi-in din a ni tawh tih an tarlang.

NVDDC chuan, N. Vanlaiphai chu Mizorama khaw pawimawh hmasa ni mah se, sorkar hmalakna hrang hrangah ngaihthah zui a nia sawiin, "Hlamchhiah kan nih avangin he lai bial Tuichangral mipui-te tawrhna hi a nasa tawh a, hrehawm kan ti tawh tak zet a ni," an ti.

NVDDC chuan, kum 1979 leh 1980-ah N.Vanlaiphai chu district headquarters a nih theih nan sorkarah ngenna an lo thlen tawh niin an sawi a; kum 2008-ah Tuichangral District Demand Committee pawhin Tuichangral district a awm ngei theih nan sorkar hotute hnenah ngena a lo siam tawh thu leh, July 25, 2013-ah N.Vanlaiphai District Demand Committee-in Chief Minister hnenah district dilna an lo thlen tawh thu an sawi bawk.

District mamawh chhan an tarlante

1. Sorkar inrêlbâwlnaah area administrative officer (AAO), administrative officer (AO) leh sub-divisional officer (civil) awpna hnuaiah hun rei tak a lo awm tawh a, heti chung hian hmasawnna kawng hrang hrangah duh angin an ṭhang thei lo.

2. International ramri depa awm an nih avangin border trade leh border security leh thil dangah harsatna a thleng mek a, chu'ng laka an him theih nan district mamawh an inti.

3. Ṭhenawm ramte nena insumdawn tawnna leh hmasawnna hrang hrangah Mizoramin hma lam a pan mek laiin, Tuichangral mipuite'n hmasawnna dawhthléng pawimawh an nei lo a, hmasawnna an neih theih nan Tuichangral mipuite'n district an mamawhah an ngai.