Hunpuiah Mizoram boruak a rálmuang Mizorama hâlpuah khap a hlawhtling lo

Mizoramah hunpui hman zawh a ni a; Krismas leh Kumthar lawmnaah boruak a rálmuang a, buaina lian tham thleng a awm lo. Hâlpuah leh hâlmawi erawh, state pumah sorkarin a khap chungin nasa taka hâl a ni a, hâlpuah hàl vanga man erawh an awm lo.

Kum hlui thlahna leh kum thar lawmna zan - December 31, 2019 zan khan Aizawl khawpui leh district khawpui tina police station hrang hrangah táng mi 43 chiah an awm a; hmeichhia man an awm lo a, mipa vek an ni. Kum hlui thlah zana man mi 43 zingah tualchhung mi táng 19 chiah an awm a, chu'ng zingah chuan zu rûi leh zu kaihhnawiha man mi 12 an ni a, mi pasarih chu chhan dang vanga man an ni. A tam zawk, mi 24 chu Inner Line Permit (ILP) nei lo leh ILP hman dik loh vanga man hnam dang an ni.

December 31 zan khan Aizawl Police Station-ah tual­chhung mi táng panga an awm a, chu'ng zinga pathum chu zu ruih vanga man niin, a dang pahnih chu pawngsual kaihhnawiha man an ni. ILP nei lo leh ILP hman dik loh vanga man hnam dang 23 an kawl a, kum thar ní, January 1 khan an state lamah thawn kîr an ni.

Bawngkawn PS-ah táng pasarih awmin, chu'ng zinga paruk chu zu ruih vanga man an ni a, pakhat dang chu rûkrûk vanga man a ni thung. Aizawl PS leh Bawngkawn PS-a zu ruih vanga mante chu a tûk, January 1 khan kum thar thilpek atan thuneitute'n an chhuahtir leh nghal.

Kum hlui thlah zan vêk khan Vaivakawn PS-in NDPS Act hmanga man tualchhung mi pakhat leh ILP nei lo hnam dang pakhat an kawl a, Lunglei police-te'n zu rûi chunga khawlaia buaina siam mi pahnih an man. Kolasib police-te'n truck-in electric hrui a hrût chah vangin driver leh handyman an man a; Mamit PS-in Kolasib District Court warrant of arrest anga man, ruihhlo vanga thubuai nei mi pakhat an kawl a, Saitual PS-ah family case-a tàntir mi pakhat an kawl bawk.

District hrang hrangah bawrh­sap/magistrate-te'n an huam chhung ṭheuhah hâlpuah leh a kaihhnawihte an khap chungin, December 31 zan khan kum hlui thlah nan leh kum thar lawm nan mi tam takin an hâl a; meithallawn (sky lantern) hmuh tur a tam hle bawk. District khawpuiahte erawh chuan hâlpuah hmuh tur leh ri hriat tur awm ve bawk mah se, a tam lo tlangpui thung.

Aizawl khawpuiah hâlpuah hâl hmuh tur leh ri hriat tur a tam hle laiin, Aizawl district-ah chuan police-te'n hâlpuah leh hâlmawi hâl vanga man an nei lo. Vanglaini palai zawhna chhángin Aizawl SP C Lalruaia chuan, hâlpuah leh hâlmawi hàl avangin police-in man an neih loh thu a sawi rualin, bazarah erawh chuan hâlpuah leh a kaihhnawih thil man an neih nual thu a sawi.