Handholding Scheme tlangzarh a ni: 'Thawk rim leh taimate tana siam a ni' - CM

Mizoram sorkar flagship programme 'Mizoram Bana Kaih (Handholding) Scheme' chu nimin khan Vanapa Hall-ah chief minister Lalduhoma'n a tlangzarh. CM chuan, "Bana Kaih Scheme hi thawk rim leh taimate tana siam a ni a, hmelhriat leh insawipui hmanga hmuh mai theih a ni dawn lo," a ti.

Handholding Scheme hi dil duh tan https://handholding.mizoram.go... ah dil theih a ni. Dilna lut aṭangin kumin October 1 aṭanga November 30 chhungin ṭanpuina hmu tur (progress partner)-te thlan a ni dawn a, December 9-13, 2024 chhungin progress partner-te tan training/orientation buatsaih a ni ang. Ṭanpuina pawisa chu January - March 2025 chhungin pek tum a ni.

Chief Minister chuan, thawk rim, taima leh tumruhte tan Mizoram sorkar a ding dawn tih a sawi a, "Bana Kaih Scheme hi thawk rim leh taimate tana siam a ni a, hmelhriat leh insawipui hmanga hmuh ve mai theih a ni dawn lo. Sorkar hmalakna dawng tur leh chang turin party induhsakna leh party-a inziah luh kher a ngai dawn lo a, party mite'n thlang loin, a thlang tur bika ruatte'n endikin an thlang ṭhin dawn," a ti.

Bana Kaih Scheme chu hun rei tawh tak aṭanga an suangtuah tawh ṭhin a nih thu sawiin Lalduhoma chuan, "Bána kaih pawha kal ṭha duh lo chu kan policy-ah an tel ve lo. Kal ṭha duh leh kaih nuamte tan he policy hi kan siam a ni," a ti.

CM Lalduhoma chuan, cheng nuai 50 loan pek an tumah sorkar chu guarantor-ah a ṭang dawn tih a sawi a, "Mahse, a pung (interest) awm lo loan kan sawi ṭhina kha, a loan la zawng zawng kan kan rulhsak dawn lo, loan rûl ṭhate chiah kan rulhsak dawn," a ti a; Scheme atan SBI, Mizoram Rural Bank leh Mizoram Cooperative Apex Bank-te nen an thawhho dawn thu leh scheme kaltlanga loan pek tura thlante chu pek tlak hlir an nih dawn thu a sawi.

Chief Minister chuan, thlai pali - sawhthing, aieng, hmarcha leh hmunphiah lei nan sum dah a nih thu leh society kaltlanga lei turin ruahmanna siam a nih thu a sawi a, "Society chu politics tel lo, hruaitu ṭha leh mi ṭhahnemngaite kaihhruai a ni tur a ni. Thlai thar lei tura sorkarin a lo puan tawhte bakah khan Kolasib leh Mamit district-ah kumina buh tharte kg-ah Rs 30 zelin leisak kan tum," a ti.

Sorkar flagship programme tlangzarhnaah hian scheme chungchang ziahna lehkhabu pahnih - 'Bana Kaih Mizoram Handholding Scheme' leh 'Thlai thar hralh dan tur kaihhruaina tawi' tihte chu Chief Minister-in a tlangzarh a, Digital Portal a hawng bawk.

Agriculture & Farmers Welfare minister PC Vanlalruata, Mizoram Agricultural Marketing Board chairman ni bawk chuan, "Mizorama sorkarna chang tawhte'n ram a dam theihna turin damdawi hrang hrang an chawh ṭhin a, sorkar kal hmasate khan theihtawp an lo chhuah tawh ṭhin. ZPM pawhin kut hnathawk leh entrepreneur-te khai chhuah a duh a, chumi atan chuan Bana Kaih a duang a ni," a ti.

PC Vanlalruata chuan, thlai leisak theih tur mi 45,585 vel portal-ah an inziah luh tawh thu a sawi a, thlai hralhna (marketing) bakah, inkalpawhna kawng (link road)-te ngaih pawimawh tel tum a nih thu a sawi. Mizoram State Policy Coordination Committee vice chairman Dr KC Lalmalsawmzauva leh member secretary Lalmalsawma Pachuau, Planning secretary-te pawhin thu an sawi a ni.

Handholding Scheme hawnnaah hian minister eng emaw zat leh sorkar officer ṭhahnem tak an tel. Páwn lamah mi eng emaw zatin stall siamin an thil neihte an pho lang a; Chief Minister leh hotu dangte'n an en kual.

Chawhnuah sorkar hnathawk deputy secretary leh a chung lamte bakah SDO (Civil) leh BDO-te pualin thlai lei tur chungchang inhrilhfiahna hun hman a ni bawk.