LRS office tharte la dâwr theih loh; Survey firm-te hman theih ṭêp tawh

Land Revenue & Settlement (LRS) department-in mipui awlsam zawkna tura Aizawl North leh South-a Settlement office an hawn thar chu dawr theih a la ni rih lo. Surveyor indaih lohna vanga ram teh leh a kaihhnawih ṭul dangte thawk tura rawih survey firm-te chu hman theih an ni ṭêp tawh.

Vanglaini palai zawhna chhangin LRS minister B Lalchhanzova chuan, Settlement office pahnihte chu dawr theih an la nih loh thu a sawi a, "Tunah hian file leh land record chinfel hna an thawk. Chinfel tur a tam em avangin over time-in hna thawk mah se, an la inpeih lo. Kum 1964 aṭanga land record zawng zawng thliar vek a ngai," a ti.

B Lalchhanzova chuan, department-a thawktute'n theihtawp an chhuah mek tih sawiin, "File leh land record-te chinfel pah hian computerised nghal zel a ni," a ti a, Settlement office-te dawr theih a nih hunah chuan mipui tan thil tih a awlsam sawt tur thu a sawi.

LRS Mninister sawi danin, Aizawlah LRS direc­torate leh settlement office-in ram teh, ram buai chinfel leh field work hrang hrangte an inchan sem a; hei vang hian directorate-in an hna pui ber direction, administration leh moni­toring-te khawih hman loin district hrang hrangte pawh duh anga vilna hun a awm lo ṭhin.

Hna kalphung siam­ṭhatna atan leh mipuiin mumal zawka an ram record awmna an hriat theih nan Aizawlah Settlement office pahnih North leh South siam a ni a, huam chin (geographical area) siam a ni. Aizawl district-a khua leh vengte chu chhim leh hmarah ṭhenin, an awmna lam office dawr tawh mai tur a ni. Director chan leh SO-te chan tia buaina leh kal sual ṭhin a bo phah beisei a ni.

Hetih lai hian, LRS department-in an rawih survey firm-te chu tlangzarh ni tawh mah se, hman theih an la ni lo a, hman theih an ni ṭêp tawh.

LRS Minister chuan, survey firm rawihah an fimkhur thu sawiin, "An hnathawh tur kalphungah thil fel tawk lo a awm palh kan hlauh avangin kan ennawn leh mek a, hman theih an ni ṭêp tawh ang. Hman theih an nih hun chuan ram teh leh thil dangte tun aia chakin kalpui theih a ni dawn a, mipuiah awlsamna a thlen dawn," a ti.

Tarlan tawh angin, empannelled survey firm-te hi September 6, 2024 khan Aijal Club-ah tlangzarh an ni a, an vaiin firm 13 an ni.