Ramri chungchanga official-te inbiak hun tur a la hriat loh

Mizoram sorkar leh Assam sorkar aiawhte ramri chungchanga official level-a an inbiak hun tur hriat a la ni lo a, Assam sorkar lam aṭanga chhanna ngaihchan mek a ni.

Home department aṭanga thu dawn danin, Mizoram Home Secretary chuan Assam Home Secretary hnenah ramri chungchanga official level-a inbiak rawtna ziakin a thlen tawh. Hei hi Assam Home Secretary-in a la chháng lo a, a chhàn hunah inbiak hun turah ruahmanna kimchang zawk siam a ni ang.

Ramri chungchanga Home minister K Sapdanga kaihhruai Mizoram sorkar aiawh leh Assam Border Protection and Deve­lopment minister Atul Bora kaihhruaite August 9, 2024-a State Guest House, Aizawla an inbiak ṭumin, March 31, 2025 hmain Guwahati-ah inbiak leh ni se tih a ni a; chumi hma chuan official level-a inbiakna neih phawt an rêl a ni.