AMC-in hotel, hostel leh restaurant fai leh thianghlim dan endik a rel

Nimin khan AMC Meeting Hall-ah AMC Board of Corporators meeting neih a ni a, Aizawla hotel, hostel leh restaurant-te'n faina leh thianghlimna chungchanga AMC dan an zawm ṭhat leh ṭhat loh enfiah an rêl.

AMC BoC ṭhutkhawm hi mayor Lalrinenga Sailo-in a kaihruai a; Ward-V corporator Rosiamngheta put luh, "Aizawl khawpui chhunga restaurant, hotel leh hostel-te hi AMC Licensing Regulations hnuaia awma establishment neia register an nih angin, an inenkawlna thianghlim leh ṭhat dan endik ni rawh se," tih chu an sawiho hnuah an pawm a ni. Hmalak dan tur duang turin sub-committee an din a, chairman atan Rosiamngheta an ruat.

Executive corporator B Lalawmpuii'n AMC Building Regulations, 2012 siamṭhat rawtna pharin, a sawifiah nghal a; member-te'n an sawiho hnuah an pawm. Building Regulation siamṭhat rawtna hi standalone factory leh flatted factory-te bakah, commercial center chhunga inte'n ram an neihte hmang ṭangkai lehzual tura Building Regulation siamṭhat rawtna a ni a; state sorkar pawmpui turin thehluh a ni ang.