Lungleiah bawlhhlawh paih thian fai

Chawlhkar hnih awh faina beihpui thlakna, Swachhata Hi Seva 2024 kalpui mek pualin Urban Development & Poverty Alleviation (UDPA) leh YMA, Lunglei Rahsi Veng Branch leh Lunglei District Adventure Club-te chuan nimin khan faina hnatlang an huaihawt.

Hnatlangah hian Lungleia district urban development officer C Sawihlira hoin UDPA department-a thawk te, Rahsi Veng YMA member-te leh LDAC member te, an vaiin mi 60 chuang an thawk chhuak a; Rahsi Veng leh Sazaikawn inkar kawngpui thlanga bawlhhlawh paihte an thian fai.

Rahsi Veng leh Saizaikawn inkara bawhlhhawlh paihna hmun ni loa bawlhhlawh paih then fai hi Swachhata Hi Seva 2024 puala District Steering Committee-in Lunglei khawpui huam chhung (urban area)-a vantlang hmunhma tihfai ngai bik (cleanliness target unit) a ruahman pariat zinga mi a ni.

Lungleiah hian Lunglei Municipal Council (LMC)-in veng parukah bawlhhlawh a khawn tawh a, a bak veng dang zawngah chuan local council-te ruahmannain bawlhhlawh khawn kalpui a ni. UDPA department chuan bawlhhlawhte chu a paihna hmun ni loah paih mai mai lo a, Hauruang kawng, Riangvai Thlanmual bula paihna hmun tura ruahman (dumping ground)-ah chauh paih ṭhin turin mipui an ngen.