Buhfai a ṭha tih kan finfiah - ZPM

ZPM party chuan thuchhuah siamin, Muanna Venga Food, Civil Supplies and Consumer Affairs (FCSCA) kudama buhfaite chu a ṭhat thu leh, Congress ṭhalaite'n buhfai chhia anga an tarlan chu buhfai tam tak awm zinga a bâl zual lai an ruh khawm a nih thu an tarlang.

Eptu party ṭhenkhatin niminah Muanna Venga kudam tlawhin, buhfaite chu mihring ei tlak loh ang hiala an sawi avangin an enfiah ve nghal tih ZPM chuan an tarlang a, "Tun dinhmunah buhfai a tam tâwk tih chiang taka hriat a ni a, buhfaite hi sorkar hmasa lam huna buhfai chhe tak, mihring ei tlak loh hial khawpa chhia pek chhuah ṭhin ang kha a awm lo a, vawiina buhfai pek chhuahte pawh buhfai ṭha tak a ni tih finfiah a ni," an ti.

ZPM chuan, buhfai tam tham tak karah a ṭha lo deuh ip hnih/khat a awm veṭhin tih sawiin, "Chutiang a awm palh a nih pawhin pek chhuah a ni ngai lo," an ti a; eptu party mite'n buhfai kudam tlawh a, hâi baw chawp a, chhe tak anga lantir an tum chu pawi an tih thu an tarlang.

Eptu party mite'n thu dik lo hmanga mipui bum an tum ṭhin chu sim tawh se an duh thu sawiin ZPM chuan, "Tlânchhe chunga Congress party-in Muanna Veng kudama buhfai chhia ei tlak loh awm anga an tarlang hi a pawi kan ti. A hmun ngeiah kalin kan endik nghal a, Congress party hian buhfai tam tak awm zinga a bâl zual lai an rût tih kan finfiah a ni," an ti.

ZPM chuan, Supply Minister hmalakna avanga September 2024 aṭanga NFSA quota quintal 1,204-a pung chu lawmawm an tih thu sawiin, "Congress party-te'n a thlawna thla tin buhfai dawn tur qtl 59,478 anga an sawi hi an hria tsual palh a nih loh chuan mipui hnena thu dik lo hrilh tumna a ni a, a thlawna kan dawn hi qtl 41,102.15 zawk a ni," an ti a; MPYCC-in buhfai chungchanga thu dik tâwk lo an theh darh chu ngaihdan tâwk nei thiam turin mipui an chah a ni.