Tribal Girl’s Hostel sak thar hawng

T Romana College-a Tribal Girl’s Hostel sak thar chu nimin khan Social Welfare & Tribal Affairs minister Lalrinpuii'n a hawng. Hostel hi sorkar laipuia Ministry of Tribal Affairs hnuaia Special Assistance to Tribal Sub Scheme aṭanga hmuh cheng vbc. 200 hmanga sak a ni.

Lalrinpuii chuan, T Romana College din chhoh dan leh mi harsa zawkte tan malsawmna a nih dan chu ropui a tih thu leh hostel chu hmeichhe zirlaite tan malsawmna a nih a beisei thu a sawi a; zirlaite chu mahni inthunun tur leh hun vawng dik turin a chah.

Girl’s Hostel hawnna inkhawm hi T Romana College vice principal R. Lalramliana'n a kaihhruai a; principal Dr Jennifer Lalbiakdiki'n college ṭhan chhoh dan a tarlang a, SWTA department assistant engineer Lalthankima'n hostel sak dan a sawi.

Tribal Girl’s Hostel hi December 2019-ah sak ṭan a ni a, October 2023-ah sak zawh a ni. Square metre 587.84-a zau, chhawng thum a ni a; a satu contractor chu Royal Consultancy Service a ni.