HIV & STI do nan debate buatsaih

Hnahthial District AIDS Prevention & Control Committee chuan nimin khan Horeb Lodge-ah Intensified IEC Campaign - India Fight Against HIV & STI pualin Debate Competition an huaihawt a; Hnahthiala sikul ṭhenkhat leh Hnahthial College aṭangin zirlaite an tel.

Inelnaah hian thupui hrang hrang a awm a; high school zirlai tan 'Vaihlo leh a kaihhnawih hman chin hian drugs hmansualna a thlen thei' tih te, higher secondary school zirlai tan 'Inchiuna hriau sem hian hriau thianghlima inchiu chu a pawi lo anga lantirin, drugs hmansualna a tihluar' tih te, college zirlai tan 'Condom hman inzirtirna hian STI/HIV darh zel tur venna ai mahin kawppuite laka rinawm lohna leh kum naupang zawkteah mipat hmeichhiat hmanna a tihluar' tihte a ni.

Debate hmanpuitu Hnahthial chief medical officer Dr R Lalsanglura chuan, HIV/AIDS leh STI chungchang leh kai theih dante zirlai kal khawmte a hrilhfiah a, natna kai lo turin fimkur a ṭul thu a sawi. Rei lo te nawmna duh vanga an dam chhung hun tichhe lo tur leh mipat hmeichhiatna leh damdawi hmanrual lakah fimkhur ṭheuh turin a chah.

Intensified IEC Campaign - India Fight Against HIV & STI pualin Hnahthial district-ah hian September 26 khian flash mob dance leh short drama competition buatsaih tum a ni a, September 27-ah quiz competition buatsaih tum a ni bawk.