Mihring ei tlak loh khawpa chhia buhfai semah MPYCC-in sorkar puh

Congress party ṭhalaite chuan nimin khan Muanna Venga FCSCA kudam an tlawh a, buhfaite chu mihring ei tlak loh khawpa chhia a niin an sawi a; buhfai ṭha lo (sample) an lakte chu nimin vêk khan Chief Minister en atan CMO-ah an pe.

MPYCC chuan, Muanna Veng kudama buhfai dahna in pathum an endik thu sawiin, "Buhfaite hi grade ‘A’ leh ‘C’ tihchian a ni lo a, mipui hnena buhfai ṭha lo pek hi CM en turin CMO-ah pek a ni," an ti a; sorkarin buhfai ṭha lo mipui hnena a sem chhuah chu an pisaah en theihin an dah thu an tarlang.

MPYCC president Laltawnliana chuan, ration buhfai chu a chhe hle nia sawiin, "Ei ngaihna kan hre lo. Vawk pûl hri avangin vawk chaw atana hman theih a ni lo a, leiṭha atante an hmang mai mai. ZPM sorkarin ration buhfai kg. 1-ah Rs 30-ah October thla aṭanga a tihsan tur chu Mizoram mipui an lungngai tak zet. Kan sorkar hrawn mek hian miretheite lu chunga vaivut tak ngial pawh an ît a, pachhiate an rûksak mek a ni," a ti.

MPYCC tarlan danin, Mizoramin sorkar laipui aṭangin thla khatah buhfai quintal 59,478 a thlàwnin a dawng ṭhin a, chumi baka mamawh belh zat Supply Minister-in a sawi chu qtl 37,522 a ni. Buhfai supply hna chhangtu pariat zinga chhang hniam ber RL Store, Kulikawn (qtl 1-ah Rs 3,400.50) thlang loin sorkarin an duhsak zawngte Rs 3,550-in a supply tir thu leh, supply-tu turte chuan mi dang an supply tir leh chhâwng nia an hriat thu an sawi.