Ran chhiarpui nei turin inbuatsaih

Ran chhiarpui vawi 21-na, Livestock Census 2024 neih tura enumerator-te pualin AH&Vety department chuan nimin khan Veterinary Polyclinic, Aizawlah training an buatsaih a, vawiinah chhunzawma zawh a ni ang.

Training-ah hian district pasarih - Aizawl, Mamit, Kolasib, Champhai, Khawzawl, Saitual leh Serchhip district-a enumerator 60 an tel a; AH&Vety deputy director Dr V Vanneitluanga'n kaihruaiin, joint director Dr F Lalramhluna'n a hawng.

Nimina training-ah hian ran chhiarpui neih tura thil pawimawhte master trainer pathum - Siamthanzauvi, C Lalrammuani leh Saibiaknunga ten an zirtir a; district pali - Lunglei, Hnahthial, Lawngtlai leh Saiha te tan September 25-26, 2024 khian Lungleiah training buatsaih leh a ni ang.

Kum 1919 aṭang khan India ramah Livestock Census neih ṭan niin, kum 5 danah neih a ni ṭhin a, Mizoramah chuan kum 1972 khan ṭan a ni. Census hnuhnung ber 20th Livestock Census chu kum 2019 khan neih a ni a, kumina neih tur hi vawi 21-na tur niin, October thla aṭangin chhiarpui neih ṭan tum a ni.

Livestock Census-ah hian ran chi (species) hrang hrang - bawng, lawi, vawk, kêl, beram, sakawr, ui, sai, sazupui, ar, varak leh arva chi dang vulhte chhiar vek tur a ni a; enumerator-te in tin bakah, dawr, office leh ran vulhna hmun zawng zawngah kalin ran vulh zat an chhiar dawn a ni. Livestock Census hnuhnung berah Mizoram chu India rama ti ṭha pathum zingah a tel.