Medical college leh Cancer Hospital tan Sorkarin thawhpuiah IGHC a sáwm

Mizoram sorkar chuan, medical college leh Mizoram State Cancer Institute changtlung tak neih a nih theih nan Indo Global Health Consortium (IGHC) thawhpui a tum.

Health department hotute hnen aṭanga thu dawn danin, Mizoram sorkarin IGHC thawhpui a tum chhan chu, medical college-ah chuan khawl changtlung leh ṭha bun tur te, zirtirtu ṭha neih a nih theihn atante leh a
ṭul anga training pe turte leh India ram páwna medical lama hnathawktute nena thawhho theihna kawng dap turtein a ni. Cancer hospital-ah chuan khawl ṭha leh a kalphungte thlak danglam sak turin a ni thung.

Medical college leh cancer hospital bakah hian, Mizo nurse zir chhuakte India ram páwna hna an thawh theihna atan IGHC hi Mizoram sorkar chuan thawhpui a tum a ni.

Tunah hian inbiakna kalpui mek a ni a, IGHC team-te hi Mizoramah ṭum hnih an rawn kal tawh. Mizoram Health department team-te pawhin Health Secretary hoin New Delhi-ah July 6-9, 2016 chhung khan IGHC team-te hmuin, thil pawimawh hrang hrang an sawipui.

Zawhna chhangin Health department hotute chuan, IGHC nena inbiakna kalpui zel ni mah se, a hlawhtlin dawn leh dawn loh hriat a la ni lo tih an sawi a, "Sum mamawh leh a intum sem dan pawh sawiho a ni tawh a, mahse, thutlukna siam a la ni lo," an ti.

IGHC hi Canada, Britain leh India rama hriselna lama hma la tura pawl hrang hrang intêlkhawm an ni a, Toronto (Canada), Watford (Britain) leh New Delhi (India)-ah hmunpui an nei.

IGHC leh Mizoram sorkarin thawhho an tumnaah hian nimin khan Health department hotute chu an minister Lal Thanzara hoin a pisaah an ṭhukhawm a; IGHC nena inbiakna neih mek a nih dan leh hmalak zui zel dan turte an sawiho.

Sorkar thuchhuah tarlan danin, IGHC team-te hi August 2016 chhungin Mizo-ram sorkar nen thawhhona thuthlung, memo-randum of understanding ziak hman ngei tura rawn zin an tum a ni.

Meeting-a tarlan danin, State Referal Hospital-a medical college din a nih theih nan July 2016 hian Ministry of Health & Family Welfare-ah application thehluh leh a ni a; kum 2016 tawp lama Medical Council of India (MCI) aṭanga inspection team lo kal turte hmachhawn turin inbuatsaihna kalpui mek a ni.