Chhim lamah thubuai ziah luh a pung

DIG (Southern Range) Joseph Lalchhuana hoin nimin khan a pisaah Half Yearly Review Meeting neih a ni a; nikum aiin kuminah thubuai ziah luh a tam thu tarlan a ni.

Joseph Lalchhuana chuan, Southern Range huam chhungah nikum kum chanve (January-June) chhungin thubuai 161 ziah luh a nih laiin kumin kum chanve chhungin thubuai 281ziah luh a nih thu a sawi a, "Nikum aia kumina case ziah luh tamna chu 74.53% a ni. Case lian - tualthah, pawngsual, hmeichhe zah-awmna tihbawrhbân leh kumtlinglo chunga hleilenna lamah thbuai ziah luh a tlahniam a ni," a ti.

DIG (SR) chuan, kumin-ah thubuai ziah luh a pung chu police-te sual do kawnga hmalakna a chakzia tihlanna a ni tih sawiin, police-te chu sualna pung zel tur khuahkhirhna kawnga ngawrh leh chak zawka
ṭan la turin a fuih.

Meeting-a tarlan danin, rûkrûk a pun bakah, zu rûi insual buai leh chhungkuaa buaina siamte chu Court-in regular case-a book zel tur a tih tak avangin nikum aiin kuminah thubuai ziah luh a tam phah a; thubuai lian tham erawk a tlahniam thung. Kumina thubuai ziah luh 281 zinga thubuai 108-ah chargesheet thehluh a ni tawh.

Meeting-ah hian 2016 kum chanve chhungin dan leh thupek kenkawhna kawngah harsatna lian tham a awm loh thu te, crime control leh crime detection pawh ṭha thawkhat a ngaih a nih thu te, inthununna ṭha taka kengkawhin, police-te chu an taksa leh hriselnate veng ṭha tura tun aia taksa sawizawite uar zual a ṭul thute leh, mipui leh NGO-te nena ṭanho a pawimawh thute sawi lan a ni.

DIG Southern Range hian Lunglei, Lawngtlai leh Saiha district-te a huam a ni.