Court-in nurse Lalbiakdiki a chhuah

Lunglei District Court-in thiam loh a chan-tir tawh, Lunglei Civil Hospital-a thawk ṭhin nurse Lalbiakdiki w/o Vanlalpeka Ngente, Lunglei Rahsi Veng chu nimin khan Lunglei District Court-a chief judi-cial magistrate Dr HTC Lalrinchhana'n a chhuah.

Tarlan tawh angin, Sangau Primary Health Centre-a thawk mek Lalbiakdiki hi Lungleia CJM Dr HTC Lalrinchhana chuan thiamloh chantirin, a hrem dan tur puan hun atan July 18, 2016 a ruat a; Lalbiakdiki chu Lunglei Civil Hospital-ah enkawl mek a nih avangin hrem dan tur puan hun chu July 20-ah a sawn angin, nimin khan judgement a puang.

Court judgement-a a lan danin, CJM chuan Lalbiakdiki'n a thubuai vanga a lo tawrh tawhna leh hremna a lo tawrh tawhte chu hremna tlingah a ngaihsak a, chhungkaw châwmtu a nih vang te, criminal record a la neih ngai loh vang te, insiam ṭhatna hun pek duh vang te, a chung thu ngaihtuah a nih chhungin ṭha taka a awm vangtein Probation of Offenders Act Section-3 hmangin a chhuah a ni. Probation of Offenders Act-in a phût angin Lalbiakdiki chu a zilhhau bawk.

Lalbiakdiki hi Court-in July 13, 2016-a thiam loh a chantir hnuah Lunglei District Jail-ah tàntir a ni a; mahse, July 14-a Court-a a inlan leh laiin nikhaw hre loin a tlu a, Lunglei Civil Hospital-ah enkawl a ni.

Nimina Court judge-ment puan a nih dawn laiin Lungleia nurse 40 vel chu Court tualah an pungkhawm leh a; harsatna lian tham a chhuak lo.