Mamit kawng ngaihsak turin sorkar phût

MNF ṭhalaite chuan, Lengpui - Langkaih (Tumpanglui) inkar kawng double lane siam tur chu nawr chak tur leh NH-44A Lengpui-Kânhmun kawng pawh ngaihsaka thawm ṭha thuai turin sorkar an phût .

MNYF hruaitute chuan nimin khan Aizawl Press Club-ah thuthar thehdarhtute an kâwm a; MNYF president K Vanlalvena chuan, Mamit district chhunga NH-44A chu a chhe nasa a, sorkarin a ngaihsak lo hle tih sawiin, kawng chhia vangin Mamit district mipui-te'n buhfai leh châkkhai dang lâk luh kawngah harsatna nasa tak an tâwk mek tih a sawi.

K Vanlalvena sawi danin, Leng-pui-Langkaih kawngpui thar tur km. 103.614-a thui double lane-a siam hna thawktu chu Gayatri Project Ltd., Hyderabad a ni a, Gayatri Project Ltd. neitu chu T Subbarami Reddy, Hyderabad niin, Congress party MP a ni a, mahse kum 2012 inthlanah a tla. Kawng siam tur thlan a nih laiin Vishakapatnam bial aṭanga MP a nih bakah, Union Mining Minister a nih lai a ni a, minister ni lai contract hna pek a ni hi dan kalh a ni.

Kawng siam nana sum ruahman chu cheng vbc. 622 ni mah se, contractor-in sum ruahman zat aia 12.42%-a hniama a chhàn avangin vbc. 544.75-a thawk zo turin inremna ziahpui a ni. March 17, 2011-a thawk ṭan a, March 17, 2014-a zo tura tih a ni a, hun tiam chhunga hna an zawh loh avangin July 17, 2017 thleng hun pawhseisak an ni.

Tunah 40% pawh an la zawh loh avangin July 2017-ah an zo dawn lo tih a chiang tih sawiin, K Vanlalvena chuan, "Kawng chanve vel chiah an la lai a, metalling leh blacktopping an la khawih lo a, Mamit leh Dapchhuah inkar an la khawih miah lo," a ti. Contractor-te hi sum ruahman ennawna tihpun an duh vangin an muang lui a, mipuiin an tuar a, hei hi mipuiin kan dodal ngam tur a ni," a ti.

Congress sorkarah hnam dang contractor-te'n hna lian an thawk vek nia sawiin, K Vanlalvena chuan, "Vai contractor-te'n hun tiam chhunga an thawh zawh loh vanga hna thawhna tur sum tihpun-sak an ni zel hi kan ngaithiam lo. Hna an thawh muan vanga hrem a hnêkin sorkarin hnathawhna tur sum a tihpunsak a ni," a ti a, Lengpui-Langkaih kawng cheng vbc. 554.74-a thawh zawh tur pawh an zawh hman loh vangin vbc. 730.50-ah tihsansak an nih thu a sawi.

Mizorama kawng leh lei siamtu hnam dang company liante'n hna an thawk muang lui a, an hna a chhe hlawm hle nia sawiin, Van-lalvena chuan, "Mizoram sorkarin contractor-te an thlan an nih loh thu chhuanlam an siam ṭhin a, hei hi chhuanlam a tling lo. MNF sorkar lai pawhin Aizawl-Lunglei World Bank Road siamtu hna thawk
ṭha lote pawh sorkarin action a lak ngam avangin kawngpui ṭha kan nei thei," a ti a; Mizoram sorkar chu Mamit district kawng siamtute chu thunun turin a phût.

K Vanlalvena chuan, Lengpui-Langkaih kawng thar siamin Lengpui-Kanhmun kawng awm sa, NH-44A chu km. 5 vel a zawh tih sawiin, kawng awm sain a chiat nasat phah bakah, kawng tharin a zawh loh chinah pawh kawng a chhe hle niin a sawi a, "Kawng awm sa hi Mizoram sorkarin a ngaihthah lui a, hei hi mipuite hmakhua ngaih tawk lohnaah kan ngai," a ti.