KHAWTHLIR

Thisen pe

Govt. Aizawl College NSS unit-te chuan, nimin khan an college-ah blood donation camp an huaihawt a, Aizawl Civil Hospital tan mipa 104 leh hmeichhia 35-in thisen unit 139 an pe.

Ward hawng

Lawngtlaia Lairam Chistian Medical Centre-a naupang ward, khum 10 awm theihna chu Thawhlehni khan LIKBK general secretary Rev. C Hrangzuala'n a hawng. Lairam Christian Medical Centre hi September 19, 2001-ah din a ni a, tunah hian khum 54 a awm a ni.

Budget pawm

Champhai District Education Committee chu Thawhlehni khan DC conference hall-ah an
ṭhukhawm a; Champhai district SSA Mission Annual Work Plan & Budget 2016-17 an pawm. Kumina budget hi nikum budget aiin 1.23%-in a tam zawk a ni.

Mamit-ah mock drill

Nimin khan Mamita Cooperative Apex Bank-ah chhiatrupna a thlen thulha inven dan tur leh chanchhuah hna thawh dan lem chan (mock drill) neih a ni a, a bul hnaia office leh mipui ṭhahnem tak an tel. Mock drill zawhah 4th. IR battalion-a State Disaster Response Force (SDRF) team-te'n damlo leh hliam chhanchhuah dan mipui an zirtir nghal.

MADC session

Mara Autonomous District Council (MADC) session chu Thawhlehni khan MADC Session Hall-ah ṭan a ni a, CEM RT Zachono-a'n The Mara Autonomous District Council (Salaries and Pensions of MDC's Fourth Amendment) Bill, 2016 a pharh. Bill hi MDC family pension-ah pension latu chhungte'n kum tina pension pung 5% nena an lak theihna tur a ni a, session ni tawp berah sawihoa pass tum a ni ang.

Zirlai thar lawm

DIET Aizawl chuan, nimin khan an auditorium-ah Pre-Service Teacher Education (PSTE) batch 21-naa zirlai thar mi 133 leh third semester-a zirlai mi 58-te lawmna inkhawm an hmang a; vice principal Rosiamliana Ralte-in fuihna thu a sawi.