Forest clearance chungchang sawiho

Environment, Forest & Climate Change department leh PWD hotute chuan, nimin khan Chief Minister's Office-ah hmasawnna hnathawh, a bikin kawngpui sial hna thawh meka forest clearance chungchang an sawiho.

Meeting hi principal secretary to chief minister Lalram Thanga'n a kaihruai a; PWD engineer-in-chief leh addl. PCCF bakah, department pahniha senior officer-te an tel.

Meeting-ah hian road project hrang hrang - national highway, state highway, World Bank, PMGSY, NLCPR, NEC leh NABARD hnuaia thawh meka forest clearance dinhmun an thlirho a, harsatna awm-te sutkian dan tur an sawiho nghal.

Department pahnihte hian ram leh mipuite hmasawnna ngai pawimawh chunga ramngawte tichhe lo zawnga kal a pawimawh thu an sawiho a; engkima inráwn tawn zel turin thu an dah.

Meeting-a tarlan danin, Forest Conservation Act, 1980-in a phût angin forest ram reng reng thil dang atana hman (diversion for non-forestry purpose) a nih dawn chuan sorkar laipui remtihna lak hmasak a ngai a ni.

Forest ram thil danga hman aiah a siam lehna atan compensatory afforestation siam a ngai. Kum 1977 hma lamah chuan forest chu Constitution-a state list a nih angin state-te thu thua dah a ni a; mahse, kum 1976-a Constitution siamṭhat hnuah Concurrent list-a a dah niin, sorkar laipui phalna lak hmasak phawt a ngai tawh a ni.