Kamalanagar aiah Chawngte tih duh

ZNP chuan thuchhuah siamin, Kamalanagar district siam tuma rawtna awm chu ngaihtuah nawn ngai an tih thu an tarlang a, "District siam tumna a awm a nih pawhin, hun lo kal zel tur atan Chawngte district tih ni zawk se," an ti.

ZNP chuan, Mizoram sorkarin Chief Secretary kaihhruai tur District Re-organisation Committee a din leh, Committee member-te June 28, 2016-a CS Conference Hall-a
ṭhukhawmin district pali - Hnahthial, Khawzawl, Saitual leh Kamalanagar district siam thar tur chungchang an ngaihtuah chu lawmawm an tih thu an sawi a; chutih rualin, Kamalanagar tih chu hnam bil thil a nih avangin, Chawngte district tih ni se an duh thu an tarlang a ni.

ZNP chuan, Chakma District Council duh loh vangin kohhran, tlawm-ngai pawl leh political party hrang hrangte'n November 12, 1997-ah Aizawlah kawng an zawh tawh tih sawiin, "Tuna Kalamanagar district siam tuma rawtna awm leh ta hi a him tawk loah kan ngai," an ti.

Sorkarin Mizo hnam himna tur a ngai pawi-mawh tâwk loa an hriat thu sawiin, ZNP chuan, "Bairabi-ah rêl lian a lut dawn tih hre sa reng chungin ILP check dan tur ruahmanna mumal a siam lâwk lo te, kan ṭha-
laite’n sorkar muthlu ben harh a ngai hialte hi vanduaithlak kan ti," an ti a; sorkarin hmalakna tak tak a nei lo a nih chuan kut an kuangkuah mai mai dawn lo tih an sawi.