MPCY-in Excise Minister thusawi an dem

MPC ṭhalaite chuan thuchhuah siamin, July 19, 2016 Aijal Club-a Excise & Narcotics minister R Lalzirliana’n chanchinbu mite a kawmnaah, zu zawrh chungchanga kohhran hruaitute demna thu a sawi chu pawi an tih thu an tarlang.

MPCY chuan, R Lal-zirliana thil sawi dan chu kohhran leh Thlarau Thiang-hlim zah lohna leh sawichhiatna lian taka an ngaih thu an sawi a, "Home Minister kam chhuak hi setana aw ráwl-ah kan ngai a, kan dem tak zet a ni," an ti a; tun hnuah chuan Mizoram, hnam leh Kristian sakhua him nana kohhran leh khawtlang hruaitute ṭhahnemngaihna zah thiama pawisa tawh turin an chah.

Mizorama kohhrante leh NGO-te'n an ngenna pawisa loa Congress party kaihhruai sorkarin zu a zawrh avangin Mizoram chu chhiatna bâwihah a inbarh lut mek nia sawiin, MPCY chuan, "Mipuite sum leh pai dinhmun a tlachhia a, vantlang nun a nghawng chhia a, rûkrûk, tualthah leh pawngsual a hluar a, chhungkaw tam takin buaina leh harsatna nasa tak an tawk a, chhungkaw kehchhiatna a thlen nasa a, hriselna a nghawng chhia a, thihna a tam phah a ni," an ti.