MNF-in Housing for All kalpui dan tur sawiho

MNF hruaitute chuan nimin khan Mizo Hnam Rûnah Housing for All scheme an sawiho a; MNF a sorkar chuan Housing for All hnuaiah Mizo mipui, in sakna tur nei lo leh in sak ṭhat duhte’n rualkhai taka an dawn theih nan hmalak an tum thu an tarlang.

MNF chuan, Housing for All chu sorkar laipuia National Democratic Alliance sorkarin India ram zalenna kum 75-na champha, kum 2022 thlen hmaa India ram mipui zawng zawngin chenna in an neih vekna atana an ruahman a nih thu an sawi a, "Housing for All-a scheme pahnih kalpui mek, in sakna tur nei lo mi harsate'n sorkar laipui ṭanpuina Rs. 1,50,000 an dawn theihna scheme leh sorkar laipuiin loan pung eng emaw zat a rulhsakna scheme-te hi Mizo mipui in sakna tur nei lo leh in sak ṭhat duhte’n rualkhai taka an dawn theih nan hmalak kan tum," an ti.

MNF chuan, Housing for All hnuaia Aizawl District Screening Committee-ah Aizawla constituency nei MLA-te an tel laia Aizawla mipui aiawhtu AMC councillor-te an tel lo chu ṭha lo an tih thu leh councillor-te chu District Screening Committee-ah
tel ngei se an duh thu an sawi.