Medical college atan Referral Hospital a insingsa mek- MPYCC

Congress party ṭha-laite chuan thuchhuah siamin, State Referral Hospital, Falkawnah hmasawnna chak takin a kal niin an tarlang a, "Ni tin deuh thaw hmasawnna a thleng mêk a, medical college-a hlángkai turin nasa takin a insingsa mek," an ti.

MPYCC chuan, State referral Hospital-ah hmasawnna a kal lo leh Health minister Lal Thanzara'n a ngaihsak lo anga MNYF-in an tarlang chu thil an hriat chian tâwk loh vang leh hmasawnna kal chak lutuk vanga a hmingṭhatna hliahkhuh an tum vang niin an sawi.

State Referral Hospital-ah kawlphetha awm loh vanga blood bank-a thisen dahte a chhiat phah nia MNYF-in an sawi chu sawifiahin, MPYCC chuan, "Blood storage-a thisen dah hi power supply darkar khat chhung lek a awm loh pawhin a chhiat vek theih avangin Health Minister hmalaknain power back-up dah a ni a, power back-up pakhat chauhin a zawh dawn loh avangin tun hnai khan power back-up dang dah belh lehin, tun-ah chuan kawlphethaah harsatna an nei tawh lo," an ti.

Congress ṭhalaite chuan, Health Minister-in State Referral Hospital a ngaihsak a, thawktute pawh a chungah an lawm hle nia sawiin, "State Referral Hospital hi medical college-a hlankai tumin nasa taka hmalak a ni a, OPD-ah pawh ni tin mi 100 - 150 an inentir ṭhin," an ti a; damdawi-in chu MNF sorkarin an lo chin chhiat vek tawh nia sawiin, chumi vanga inthlahrung lo turin MNYF-te an chah a ni.