Covid-19 dona-a hlawh nei loa Thawkte chawimawina hlan an ni
ZONET Cable TV leh Mizoram Government Doctors' Association (MGDA) chuan September 25, Zirtawpni zan khan Covid-19 donaa hlawh nei loa thawk tur leh a hmatáwnga ṭang tura inpete chawimawina an hlân. He huna khuallian Dr R Lalthangliana, Health minister chuan, theihtawp an chhuah tlân chuan chhànna dik an dawn ngei a rin thu a sawi.
ZONET leh MGDA hian hlawh nei loa hripui dona rál hmatáwnga awmte ṭanpuina turin vehbûr an khawn a, mi eng emaw zatin thawhin, Rs. 13,50,000 a tling. Sum thawh khawm aṭang chuan Covid-19 frontline worker volunteer mi 193 hnenah Rs. 7,000 ṭheuh leh chawimawina thuchei hlan a ni.
Chawimawina hlanna inkhawmah Health Minister-in Rs. 30,000 leh Covid-19 Medical Operation Team chairman Dr ZR Thiamsanga'n Rs. 10,000 an thawh bakah MGDA-in Rs. 14,000 leh ZONET-in Rs. 4,000 an dawn belh a ni. Chu'ngte nen chuan sum hmuh zawng zawng chu Rs. 14,09,000 a tling.
Chawimawina hi medical lama thawk bik, kumin July hma lama inpete hnenah hlan phawt a ni a; an pek chin zinga tel ngei tur ni si, hmaih palh an awm chuan September 30, 2020 ral hmain MGDA hruaitute phone number 9436141929 emaw, ZONET phone number 9862648150-ahte inhriattir turin an ngen.
HFW minister Dr R Lalthangliana chuan, a tìr lamah Covid-19 chuan India ram a nghawng dawn lo emaw an tih thu sawiin, "Tunah chuan mi nuai khat ṭhelh an thi tawh. Mizoramah erawh chuan thi kan la awm lo. Ram ropui, mithiam tamna leh medical facility nei ṭhate pawh an mualpho. Kan vanneihzia kan hriat ka duh. Theihtawp kan chhuah zel chuan a chhángtuin chhanna dikin min chhang ngeiin ka ring," a ti.
Covid-19 donaah Mizo mipui thawhhona a ṭhat thu sawiin R Lalthangliana chuan, "Ṭanpuina lut pawh a tam. Chawhmehte kan inpe a, kei kei tih awm lo a, nang nang tih rilru pua kan pên chhuakte hi a ropui. Hlawh nei miah loa inpete inpekna hi Pathian hian a en liam lo," a ti a; hrisel lohna vanga pên chhuak ve thei lote pawh ram himna turin theihtawpa an ṭawngṭai ṭhin thu a sawi.
Health Minister chuan, Covid-19 chu do fuh a harsa nia sawiin, "Indona dangah chuan silai tinna tur a chiang a, Covid-19 ah erawh chuan silai tinna tur hriat hleih theih a ni lo. Chêtsual a awl em em a, WHO leh ICMR pawh an che fuh thei lo. Thil ṭha tak tura an ngaihte a ṭha lo leh ṭhin. Chuvangin, tih dik loh tam tak kan nei ang," a ti.
MGDA president Dr Chawngthanchhunga pawhin thu sawiin, Covid-19 donaah Health Minister-in ṭan a la nasa tih a sawi a, "A inpekna a ropui tak zet a, keini lam pawh min nawr kal reng. Hripui hi Health department chan a ni ta lo emaw tih tur khawpa department dang an pên chhuakte hi a ropui tak zet a ni," a ti a, Covid-19 donaah kohhran leh khawtlang an ṭangkai tak zet thu a sawi.