Mizoram chhunga kái chhâwng Aizawl dist. páwnah hmuh a ni

Mizorama Covid-19 vei hmuh chhuah zingah state páwna aṭanga rawn lut ni lo, Mizoram chhunga kai chhâwng an pung zel. Mizorama kái chhàwngte chu hun rei tak chhung Aizawl district-a mi vek an ni a, Aizawl district páwn lama a vawi khat nan Serchhip district-ah hmuh chhuah a ni ve ta.

Serchhipa hripui vei, local positive contact aṭanga kai nia hriat hmuh hmasak ber chu September 26-a hmuh chhuah zinga mi a ni a; amah hi Covid-19 donaa frontline worker zinga mi hmeichhia pakhat, kum 26 mi a ni.

Serchhipa Health department hotute chuan, an district-a frontline worker zinga Covid-19 positive pakhat chu swab sample latute zinga mi a nih thu Vanglaini an hrilh a, "Sample lain an chhuak ve fo a, a kai ṭanna han sawi tur bik a awm lo a, BSF hmunahte sample laa an kal ṭhin avangin chuta ṭang chuan a nih kan ring ber. Anni ho hi inah an haw ngai lo a, Forest Rest House-ah an inkulh a ni," a ti.

September 26-a ZMC-a hripui vei hmuh zinga mi 12 chu Mizoram chhunga kái an ni a, a hmaa positive-te sûlhnu chhuina aṭanga swab sample endik an ni tlangpui. September 25-a Covid-19 positive hmuh chhuah mi 49 zingah local positive contact pali an awm a a, hmeichhia kum 75 mi a tel. Republic Venga hmeichhe pakhat, kum 51 mi chu rinhlelh vanga endik ni loin, an pisaah a remchan vanga endik a ni a, rinhlelh a nih loh avang hian in lamah pawh a inkhung lem lo niin an venga LTF hruaitute chuan an sawi. RAT hmanga hmuh chhuah mipa pakhat pawh rinhlelh vanga endik a ni lo a, state páwnah zin chhuah a tum vanga inendiktir a ni.

Mizorama khua/veng (VC/LC) pakhata Covid-19 vei hmuh chhuah tamna ber chu Bawngkawn a nia hriat a ni. Bawngkawn LTF hruaitute chuan, an vengah hripui vei hmuh tawh zat chu mi 65 an ni a, mipa 19 an chhuak leh tawh a, mi 46 enkawl mek an ni tih an sawi.