Kângmei chhuak thelh dan turah PHE department-in ruahmanna siam

PHE minister Zodintluanga chuan, Aizawl khawpui chhunga kângmei a chhuah chánga kâng ṭhelh motor-te'n awlsam zawka tui an chawi zung zung theih nan hmun 40-ah PHE-in tui an lak mai theihna tur (fire hydrant) an vuah belh tur thu a sawi a; Aizawla veng tinah kâng
ṭhelhnaa hman theih tur point 400 an la vuah dawn tih a sawi bawk.

Minister Zodintluanga hian nimin khan a pisaah awlsam leh rang zawka kâng ṭhelh a nih theih nana PHE department hmalakna thar an ruahmante chu thuthar thehdarhtu
ṭhenkhatte a hrilhfiah a; "He kan hmalakna hi Planning department-in min phûrpui a, local council-te'n min tuipui bawk a, kan lawm hle," a ti.

Zodintluanga chuan, Aizawl khawpui ṭhang zelah mihring, lirthei leh in leh lote a pung nasa tih sawiin, "Kangmei a chhuah chángin kang ṭhelh motor kal zung zung a harsa a, PHE department chuan harsatna sutkian dan tur a ngaihtuah a, ruahmanna a siam ta a ni," a ti a; tun dinhmunah Aizawlah fire hydrant pathum/pali chauh a awm avangin harsatna a tam a, in kâng ṭhelh hman loh a tam phah tih a sawi.

PHE Minister sawi danin, Aizawl khawpuia hun 40-ah kâng ṭhelh motor-in tui an chawi theihna tur (fire hydrant) 40 an vuah belh dawn a, Aizawla local council 83 chhunga kang ṭhelh motor kal theih lohna hmunah pawh kângmei chhuakte ṭhelh zung zung a nih theih nan hmun 400-ah kâng ṭhelhna tui pipe (hose coil) chuktuahna tur point 400 vuah a ni dawn.

Ruahman dan chuan, local council 83-te'n an veng ṭheuhah kâng ṭhelhna tui pipe vuahna tur point an ruahman ang a, chungah chuan point vuah a ni ang. Veng hrang hrangah point eng emaw zat a awm dawn a, veng ṭhenkhatah chuan point 10-te pawh a awm dawn. Aizawl hmar lam veng 40-ah point 200 leh Aizawl chhim lam veng 38-ah point 200 vuah a ni ang.

Local council-te chu kâng ṭhelhna pipe hlûm (hose pipe coil) panga ṭheuh pek an ni dawn a, hose pipe coil pakhat metre 30 zela sei a ni. Zodintluanga chuan, "Motor kal theih lohna hmunah kângmei a chhuah palh pawhin heng point aṭang hian ṭhelh zung zung theih beisei a ni," a ti.

Zodintluanga chuan, kângmei a chhuah palha rang taka ṭhelh a nih theih nan Aizawl veng hrang hranga tuizém (tanky) tinah tui metre khat tal awm reng tura tih a nih thu a sawi a; PHE tuizem lianah pawh kâng ṭhelh motor tan tui chawi tur a awm reng thu a sawi bawk.

PHE Minister pisaah hian PHE department hotute'n hmanraw thar an bun turte hman dan an sawifiah nghal a; ruahmanna thar atan hian sum an nei tawh tih sawiin, "Cheng nuai 109 ruahman a ni a, hmanrua hi Guwahati-ah a hranpaa siamtir a nih avangin a taka vuah nan thla hnih a la ngai ang," an ti.