Rangkachak tawlhrûk thuah CBI an la ngawi

Mizoram sorkarin rangkachak tawlhrûk suam thubuai chhui tura ngenna a thawn chu, Central Bureau of Investigation (CBI) chuan Mizoram sorkar an la chhang lo.

Mizoram sorkar hminga CBI hnena rangkachak tawlhrûk thubuai chhui tura ngenna thawntu Home Secretary chuan Vanglaini palai zawhna chhangin, "CBI hnen aṭangin thu dawn kan la nei lo. Thâwm engmah an la rawn neih loh avangin an chhui dawn leh dawn loh kan la hre thei bik lo," a ti a; CBI-te chu biak leh a tum thu a sawi.

Rangkachak tawlhrûk thubuai chhui tura ngenna hi Mizoram police-te'n rawtna an thlen angin Mizoram sorkar chuan an thawn a ni.

Hetih lai hian, he thubuai chhui tura Mizo-ram sorkarin a din Special Investigation Team (SIT) chuan hnu chhui hna an kalpui zel a, thu zawhfiah atan mi eng emaw zat an ko.

He thubuaiah hian SIT-te chuan mi 14 an man tawh a, mahse, an vaiin Court-in bail-in a chhuah tawh a ni.