Rang taka chargesheet thehluh a nih theihna turin Police-te'n ṭan lak tum

Mizoram police-a Northern Range huam chhunga SP leh Traffic SP-te chuan, nimin khan DIG (NR) LT Hrangchal hoin a pisaah Crime Review Meeting an nei a; chargesheet thehluh hman loh vanga bail-a chhuak an awm loh nan ṭan lak an rêl.

Meeting-ah hian thil tisual tua puh te, a bik takin POCSO Act (naupang humhimna dan) bawhchhiate a hun taka chargesheet thehluh hman loh vanga bail-a chhuahtir an awm loh nan ṭan lak lehzual ni se, an ti.

ILP dik lo leh nei lote dap chhuah kawnga nasa lehzuala ṭan lak te, VDP hman ṭangkai lehzual te, VDP awm lohnaah chuan din theih nana hmalak te, YMA nena ruihhlo dona kawnga chak taka thawhhote pawh meeting-ah hian rel a ni.

Meeting-a tarlan danin, nikum January-June chhung aiin kumin January-June chhungin DIG (NR) huam chinah thubuai ziah luh a tam zawk a; kum 2015-ah thubuai 1,009 ziah luh a nih laiin, kum 2016-ah thubuai 1,144 ziah luh a ni thung.

Kum 2015-ah tualthah thubuai 14 leh pawngsual thubuai 27 ziah luh a ni a, hei hi kumin aiin a tam zawk. Kuminah chuan tualthah leh pawngsual thubuai pakua ve ve ziah luh a ni.

Nikum aiin kuminah rûkrûk thubuai ziah luh a tam a, nikumah thubuai 576 ziah luh a nih laiin, kuminah chuan 710 ziah luh a ni. LT Hrangchal chuan, SP-te chu rûkrûk veng tura ṭan la sauh sauh turin a fuih a, "Mipuite pawh an bungrua dah fimkhur tura ngen ni se," a ti.