Sorkar laipuiin BPL tribal hmeichhiate Gas connection a thlawnin a pe dawn

Social Welfare department (SWD) chuan nimin khan Aijal Club-ah an department hmalakna leh hmachhawp hrang hrangte an sawiho a; SWD minister PC Lalthanliana chuan, sorkar laipuiin BPL tribal chhungkuaa hmeichhia gas connection la nei lote a thlawna pek a tum thu a sawi.

Social Welfare Minister chuan, "Tun hnaiah Ministry of Tribal Affairs-in BPL tribal chhungkuaa hmeichhe puitling gas connection la nei lote tan a thlawna pek a tum. Ram pumah he scheme kalpuina tur district 181 an thlan zingah Mizorama district pariat an rawn thlang vek hi a vanneihthlak hle a ni," a ti a; gas connection la nei lote thlannaah khawtlang hruaitute nen thawk-hoin fimkhur taka an kal tur thu a sawi.

Department officer leh thawktute inhmuhkhawm a, hmalaknate inhriatpui leh sawiho chu a hlâwk tih sawiin, PC Lalthanliana chuan, "Department khata thawkho hi induhsak nachang an hriat chuan thawhho a nuamin a chak ṭhin," a ti.

Social Welfare Minister sawi danin, old age home leh observation home sakna tur cheng vaibelchhe li ve ve dah a ni tawh. Observation home hi district zawng zawngah ICDS hnuaiah hawn vek tur a ni a, thawktu tur pawh lak fel tawh tawh a ni.

Parliamentary secretary (Social Welfare) K Lalrinthanga pawhin thu sawiin, SWD chuan mi dangte hriat lohin hnathawh an ngah tih a sawi a, "Nau pai aṭanga tar thlenga an enkawlna kawngah an inpekna leh hnathawh dan chu a fakawm hle a ni," a ti.

Meeting-a tarlan danin, Integrated Child Development Scheme (ICDS) hnuaiah anganwadi centre 2,244 a awm mek a, naupang enkawl mek zat chu 1,43,680 a ni. ICDS District Cell chu Aizawl leh Lunglei ah din tawh a ni tawh a; district dang pali - Mamit, Champhai, Kolasib leh Lawngtlai-ahte din tura hmalak mek a ni.

Prime Minister-in a tlangzarh tawh, hmeichhe naupangte hamṭhatna keng bik scheme, ‘Beti Bachao, Beti Padhao’ chu Siaha district-ah kalpui mek a ni a; scheme hi child sex ratio national average 1000:918 aia hniamah chauh hman tura tih niin, November 2014 aṭangin anganwadi centre zawng zawngah zawm nghal a ni.