Zorama'n college zirlaite hmaah thu a sawi

MNF president Zoramthanga chuan Kolasib College-a Political Science department-in an sàwm angin nimin khan Kolasib College-a zirlaite hmaah 'Mizo national movement' chungchang a sawi a; MNF din chhante leh Mizoram zalenna tura an bei dante a sawi.

Zoramthanga chuan, Mizoram chu mi thuhnuaia awm ngai lo, mahnia ro inrel leh thuneihna tawp nei a nih ṭhin thu sawiin, "Kum 1947-a India din a nih khan kan tel ve lohna leh kan ngaihdan sawina hun pe hauh loa Indiaa rîn luh, barhluiha tel ve chauh kan ni," a ti.

Mizoramah mautam ṭâm laiin Assam sorkarin Mizoram a enkawl ṭhat loh vangin sorkar koh eih nan Laldenga ten MNF an din tih sawiin, Zoramthanga chuan, October 22, 1961-ah Pu Laldenga ten MNF an din hma khan Mizo hnama harh tharna lo piang kha India chuan a ngaimawh daih tawh," a ti a; Mizo hnam thinlung putna leh harh tharna ram pumah alh chhuak chu India-in hmehmih tumin hma a la nghal niin a sawi.

Zoramthanga chuan, MNF-in India laka zalenna a puang a, chuvang chuan India nen an indo ta tih sawiin, MNF-in Mizoram chu sorkar thara a puan avangin America sorkar kalphung zûlzuia inawp a nih thu a sawi a, "Hemi chhung hian tih fuh tâwk loh kan nei ang. Mahse, keini'n independent neih tumin hmalak zel la duh mah ila, kan thawh chhan ber Mizo mipuite'n tlin an inti tawh lo a. Political party zawng zawng, kohhran hruaitute inzawmkhawm te, YMA leh MZP-te'n theihtawpin inremna atan hma an la a, Memorandum of Settlement kan ziak ta a ni," a ti.