Solar energy hman ṭangkai dan tur sawiho

Nimin khan Lawngtlai DC conference hall-ah DC Dr A Muthamma hoin, sorkar department hrang hrangte'n ni chakna hmanga siam, solar energy hman ṭangkai theih dan tur an sawiho.

Meeting-ah hian Power & Electricity aiawhte'n solar energy hman ṭangkai dan tura ruahmanna Grid Connected Solar Rooftop System (GCSRS) an sawifiah a; hmalakna tura ruahmanna hrang hrang an sawiho nghal.

Sorkar thuchhuah tarlan danin, ram pumah duh khawp power supply a awm loh avangin sorkar laipui aṭangin sorkar pisa leh sikul hrang hrangah solar energy hmang ṭangkai tura ruahmanna kalpui a ni a, ruahmanna chu GCSRS tih a ni.

GCSRS-ah chuan, in chungah solar panel dah a ni ang a, chu chuan ni êng hnuaiah power siam chhuakin, mamawh hrang hranga hman nghal theih tur a nih bakah, hman sên loh awm chu ni êng awm loh hun pawha eng emaw chen la daih thei turin grid-ah khawl khawm a ni ang.