Kuminah NLUP bawng 424 la lut tawh Bawng leinaah receipt inpek a ni lo
Animal Husbandry & Veterinary department chuan January-June 2016 chhung khan NLUP hnuaia sem tur state páwn aṭangin bâwng 424 an la lut tawh a, bawng lak luhnaah hian receipt/voucher/invoice inpek a ni lo. Bawng lak luh zinga thi report an dawn chu 10 a ni.
RTI Act hmanga zawhna AH&Vety department SPIO-in a chhan danin, kumin January-June thla chhunga NLUP hnuaia sem tur bawng lâk luhte chu Assam leh Meghalaya aṭanga phurh khawm a ni a; bawng pakhat atan Rs. 65,000 zel ruahmanin, bawng 424 atan Rs. 2,75,60,000 an hmang.
Bawng 424-te chu mi 212 hnenah pahnih zela pek a ni a, Assam leh Maghalaya-a bawng laknaah a dawngtu turte emaw, an aiawhte emaw an kal vek a ni. 'AH&Vety department aṭanga kalpuitu tute nge?' tih chu senior vety officer leh vety officer-te'n a inchhâwkin a hmunah an awmchilh a, kalkawnga bawng enkawl turin VFA-te a inchhawka an kal ṭhin bawk thuin an chhang a; vety officer leh VFA-te hming ziah lan a ni lo.
Bawngte chu Meghalaya-a Vety doctor-in an endik a, health certificate pek vek a nih thu leh, Vairengtea ni hnih chawlhpui a nih laiin an hriselna endik vek a nih thu te, bawng panga vel chu transportation stress vanga enkawl an nih thu te, Vairengte aṭangin phurh chhuah tlak an tihte chauh phurh chhuah a nih thute an tarlang bawk.
Bâwng leinaah bawng neitute aṭangin receipt/voucher/invoice lak a nih leh nih loh zawhna leh, lak a nih chuan photo copy pe tura dilna chu 'Department-ah receipt/voucher/invoice inpek a awm lo," tia chhàn a ni.
AH&Vety department hian kumin chhunga NLUP bawng sem tawh thi report an dawn zat chu 10 a ni a; bawng thi neitu an tarlante chu - South Vanlaiphai, Lung-dai, Armed Veng, Sih-phir, Chite Veng, Muthi leh Sakawrtuichhunah pa-khat ṭheuh leh Mamit Veng-hlunah pahnih an ni.
AH&Vety depart-ment-in RTI Act hmanga zawhna an chhanah hian, bawng thi 10 an chhinchhiah zingah Durtlang North-a mite bawng a tel lo. Chutih laiin, MPC ṭhalai leh Durtlang North Multi Commodities Societies hruaitute'n June 8, 2016-a Aizawl Press Club-a press conference an neih ṭumin, kumin April thla tir lama Meghalaya aṭanga lak luh NLUP bawng, Durtlang North-a mite'n an dawnte zinga 16 an thih tawh thu an sawi.
NLUP hnuaia sem bawng thite chu sorkarin a dawngtute hnenah zangnadawmna pek tumna a nei lo tih an tarlang a, "NLUP hnuaia bawng lak zawng zawng hi insure sak vek an ni a, a thite hi bawng pakhatah Rs. 30,000 zel a pe thei a ni," an ti.
Bawng dawngtute'n an bâwng dawnah an lungawi ngei tih ziakin an dah tih sawiin, AH&Vety pawhin an lungawi ngeia an ngaih thu an tarlang a; chutih laiin, Durtlang North Multi Commodities Societies hruaitute chuan, bawng an duh loh ang deuh la mah se, an lungawi thu ziak loh thei loa nawr an nih thu leh bawngte chu duh lo thei loa siam an nih thu an lo sawi tawh thung.
Kum 2016-a NLUP bawng lak luh dan
# Lak luh ni Lak luh zat Semna
District
1. February 27 16 Champhai
2. March 29 32 Champhai
3. March 3 32 Champhai
4. March 7 32 Kolasib
5. March 10 32 Kolasib
6. March 14 32 Kolasib
7. March 17 28 Mamit
8. March 21 32 Kolasib
9. March 24 32 Lunglei & Serchhip
10. March 28 32 Aizawl
11. March 31 32 Aizawl
12. April 4 32 Aizawl
13. April 7 32 Aizawl
14. April 11 28 Aizawl, Lunglei & Siaha