Nurse chêt dan vanga department A mualpho hi a pawi: Health Minister

Health minister Lal Thanzara chuan, Lungleia nurse chêt dan vangin Health deptartment a mualpho niin a sawi a, "A vanduaithlakin, a pawi hle a ni," a ti.

Health Minister hian nimin khan Congress Bhavan-a inkhawmah thu sawiin, "Indaih loh-na vangin nurse-te hi an thawkrim hle a, ngaih-hnathiamna chin neihte pawh a ngai. Chutih laiin, ngaihhnathiam theih loh chinte pawh a awm a, kan inzilh mek a ni," a ti a; in-siamṭha turin medical superintendent-te nen an inbiakpawh reng thu a sawi.

Health department tih-chakna atan doctor specialist paruk, nurse 25 leh health worker 200 chuang lak a ni dawn tih sawiin Lal Thanzara chuan, "Hei hian indaih lohna tam tak a phuhrûk ang. Health worker lak tur hian sub-centre-a indaih lohna a phuhru turah kan ngai," a ti.

Health Minister chuan, cancer hospital khum 100 awmna tur Zemabawkah ruahman mek a nih thu sawiin, "Cancer hospital-ah hian khawl thar cheng vbc. 20 chuang man radiation khawl bun tura ruahman a ni," a ti a; Mizo mipuite'n phai lam an pan ngai lo turin khawl lei thar zel a nih thu a sawi bawk.