Housing for All dik taka kalpui phût Kalpui a nih dan kan vil dawn - MNF

MNF hruaitute chuan nimin khan Mizo Hnam Rûnah thuthar thehdarhtute kâwmin, Housing for All chu dik taka kalpui ngei turin sorkar an phût a; dik taka kalpui a nih leh nih loh an vil reng tur thu an sawi.

MNF vice president Dr R Lalthang-liana chuan, sorkar laipuiin India independent kum 75-na thlen hun kum 2022-ah chuan chhungkaw tinin chenna in pangngai an nei vek tawh tura ruahmanna a siam thu sawiin, "Hemi atan hian Pradhan Mantri Awas Yojana (PMAY) an duang chhuak a, Mizoramah pawh kalpui mek a ni," a ti.

Dr R Lalthangliana sawi danin, Housing for All hi Mizoramah chuan khawpui 23-ah kalpui tur a ni a; scheme hi chi hnih - Credit Linked Subisdy leh Benificiary Led Individual House Construction/Enhancement-ahte ṭhen a ni.

Credit Linked Subisdy hi bank aṭanga a pung tlem chi, 6.5%-a punga Rs. 6,00,000 thleng pûk theihna a ni a; Benificiary Led Individual House Construction/Enhancement chu in hmun nei si, a sakna tur nei lo chhungkuate tana sorkar ṭanpuina Rs. 1,50,000 dawn theihna a ni thung.

Housing for All scheme hi party induhsakna atana hman emaw, party-a inthlêm luhna hmanruaa hman emaw, ruling party mi leh sa an nih loh vanga dawn ve loh theih a nih lo tih sawiin MNF Vice President chuan, "Insawitheihna atana hmante a rem dawn lo. A dawng tur dik takte'n an dawn theih nan a buaipui leh enkawltu department-te dik taka thawk turin kan beisei," a ti.

Dr R Lalthangliana chuan, scheme chu kalpui a nih dan an party-in an vil reng dawn tih sawiin, "Sorkar pawh he scheme hi fimkhur tak leh dik taka kalpui turin kan phût a, NLUP anga party induksakna atana hman a rem dawn lo. Chutiang thil a awm chuan kan enzui zel ang," a ti a; scheme kalpui dana thil dik lo hriate chu MNF office-a thlen turin mipui a ngen.

MNF MLA Lalrinawma pawhin thu sawiin, "He scheme guidelines chuan scheme kalpuina tur khuaa bialtu MLA-te chu Screening Committee-a tel tur tih a nih laiin, kan tel lo. UDPA Minister kan hmuh hnuah min telh ve leh chauh a ni," a ti.

Dr K Beichhua pawhin thu sawiin, autonomous district council huam chhungah chuan Committee-ah CEM-te an telh thu sawiin, "Aizawl atana Committee din a, AMC Mayor telh loa CEO an telh daih hi hriatthiam a har hle," a ti a; Committee din dan chu sorkarin ennawn se a duh thu a sawi.

Zawhna chhangin Dr K Beichhua chuan, Screening Committee-a MLA-te telh an nih hmain ruahmanna eng emaw zat kalpui a ni tawh tih a sawi a, "MLA-te min telh leh hnuah ruahmanna lo siam tawhte chu cancel a ni," a ti.